ബാഴ്സലോണ: സ്പാനിഷ് ലാ ലിഗ ഫുട്ബോളിലെ കറ്റാലൻ ഡെർബിയിൽ എഫ്സി ബാഴ്സലോണയ്ക്കു മിന്നും ജയം. ആദ്യ പകുതിയിൽ മൂന്നു ഗോൾ നേടിയ ബാഴ്സലോണ 3-1നു എസ്പാന്യോളിനെ കീഴടക്കി. ഈ സീസണിൽ ക്ലബ്ബിലെത്തിയ ഡാനി ഓൾമോ (12’, 31’) ഇരട്ട ഗോൾ സ്വന്തമാക്കി.
ബ്രസീൽ താരം റാഫീഞ്ഞയുടെ (23’) വകയായിരുന്നു മറ്റൊരു ഗോൾ. കറ്റാലൻ ഡെർബിയിൽ ഇതോടെ ബാഴ്സലോണ തോൽവി അറിയാതെ 27 മത്സരങ്ങൾ പൂർത്തിയാക്കി. മറ്റു മത്സരങ്ങളിൽ അത്ലറ്റിക്കോ മാഡ്രിഡ് 2-0നു പാൽമസിനെയും റയൽ സോസിഡാഡ് 2-0നു സെവിയ്യയെയും തോൽപ്പിച്ചു.
അത്ലറ്റിക്കോ ബിൽബാവോയും റയൽ ബെറ്റിസും 1-1 സമനിലയിൽ പിരിഞ്ഞു. ലീഗിൽ 12 മത്സരങ്ങൾ പൂർത്തിയായപ്പോൾ 33 പോയിന്റുമായി ബാഴ്സലോണ ഒന്നാം സ്ഥാനത്തു വിഹരിക്കുന്നു. 11 മത്സരങ്ങളിൽ 24 പോയിന്റുള്ള റയൽ മാഡ്രിഡാണ് രണ്ടാം സ്ഥാനത്ത്. അത്ലറ്റിക്കോ മാഡ്രിഡ് (23) മൂന്നാം സ്ഥാനത്തുണ്ട്.
