കൊച്ചി: പിറന്നാള്‍ ദിനത്തില്‍ മലയാളത്തിന്‍റെ സൂപ്പർ സ്റ്റാർ മമ്മൂട്ടിയിൽനിന്നും അപ്രതീക്ഷിതമായി സമ്മാനം കിട്ടിയ സന്തോഷത്തിലാണ് രണ്ടാം ക്ലാസുകാരനായ മഹാദേവ്.
ഒരു കുഞ്ഞ് ലംബോര്‍ഗിനി കളിപ്പാട്ട കാറാണ് മമ്മൂട്ടി മഹാദേവിന് സമ്മാനിച്ചത്. സമ്മാനം നല്‍കിയതിനൊപ്പം കുട്ടിയെ ചേര്‍ത്തുപിടിച്ച് ഷേക്ക് ഹാന്‍ഡ് കൊടുത്ത് ഹാപ്പി ബര്‍ത്ത് ഡേ എന്ന് അദ്ദേഹം ആശംസിക്കുകയും ചെയ്തു.
എറണാകുളം പനമ്പിള്ളിനഗറിലെ ഫ്‌ളാറ്റിലാണ് മമ്മൂട്ടിയുടെ പുതിയ ചിത്രത്തിന്‍റെ ഷൂട്ടിംഗ് നടക്കുന്നത്. ഇതിന് തൊട്ടടുത്ത ഫ്‌ളാറ്റിലാണ് മഹാദേവും കുടുംബവും താമസിക്കുന്നത്. ഷൂട്ടിംഗിന്‍റെ ഇടവേളകളില്‍ കുഞ്ഞു മഹാദേവ് മമ്മൂട്ടിയുമായി സൗഹൃദത്തിലായി. കഴിഞ്ഞ ദിവസം മഹാദേവിന്‍റെ പിറന്നാളായിരുന്നുവെന്ന് മനസിലാക്കിയ മമ്മൂട്ടി കുട്ടിക്ക് സമ്മാനവുമായി എത്തുകയായിരുന്നു.
മഹാദേവിന് മമ്മൂട്ടി പിറന്നാള്‍ സമ്മാനം നല്‍കുന്ന വീഡിയോ സോഷ്യല്‍ മീഡിയകളില്‍ വൈറലാണിപ്പോള്‍. മമ്മൂട്ടി നല്‍കിയ സമ്മാനം തുറന്നുനോക്കുന്ന മഹാദേവിന്‍റെ ഞെട്ടലും “എന്‍റെ മോനേ, ലംബോര്‍ഗിനി’ എന്ന വാക്കുകളും വിവിധ സാമൂഹിക മാധ്യമ പേജുകളില്‍ ശ്രദ്ധയാകര്‍ഷിക്കുകയാണ്. ഗൗതം മേനോന്‍ സംവിധാനം ചെയ്യുന്ന ചിത്രത്തിലാണ് മമ്മൂട്ടി ഇപ്പോള്‍ അഭിനയിച്ചുകൊണ്ടിരിക്കുന്നത്. മമ്മൂട്ടി കമ്പനിയാണ് ചിത്രം നിര്‍മിക്കുന്നത്.
