വളര്‍ത്തു നായയെ ഭക്ഷണമാക്കാനായി നായയുടെ പിറകെ വീടിനകത്തു കയറിയ പുള്ളിപ്പുലി പെട്ടു. വീട്ടുകാര്‍ പൂട്ടിയിട്ട പുലിയെ വനംവകുപ്പ് അധികൃതരെത്തി കൂട്ടിലാക്കി വനത്തില്‍ വിട്ടു. ഇന്നലെ ഉഡുപ്പി ബ്രഹ്മാവറിലാണു സംഭവം.
ബ്രഹ്മാവര്‍ നൈലാഡിയില്‍ ഒരു വീട്ടിലെ വളര്‍ത്തു നായയെ പിന്തുടര്‍ന്നെത്തിയതായിരുന്നു പുലി. നായ പ്രാണരക്ഷാര്‍ഥം വീടിനകത്തേക്കു കയറി. പിന്നാലെ പുലിയും. ഇതോടെ വീട്ടുകാര്‍ മുറി പുറത്തു നിന്നു പൂട്ടി വനം വകുപ്പില്‍ വിവരം അറിയിച്ചു.
തുടര്‍ന്നു വനം വകുപ്പ് അധികൃതരെത്തി ഒന്നര മണിക്കൂര്‍ പണിപ്പെട്ട് പുലിയെ കൂട്ടില്‍ കയറ്റി. വൈദ്യ പരിശോധനയ്ക്കു ശേഷമാണു പുലിയെ വനത്തില്‍ വിട്ടത്.
