സ്‌റ്റോക്‌ഹോം: കൂട്ടമാനഭംഗ രംഗം ഫേസ്ബുക്കില്‍ ലൈവിലൂടെ പുറത്തുവിട്ടവര്‍ അറസ്റ്റില്‍. സ്വീഡന്‍ തലസ്ഥാനമായ സ്‌റ്റോക്‌ഹോമിലാണ് സംഭവം. 18, 20, 24 വയസ് പ്രായമുള്ള മൂന്നു യുവാക്കളാണ് അറസ്റ്റിലായിരിക്കുന്നത്. ബലാത്സംഗ കുറ്റത്തിനുപുറമേ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിപ്പിച്ചതിനും അറസ്റ്റിലായവര്‍ക്കെതിരെ കേസ് രജിസ്റ്റര്‍ ചെയ്തിട്ടുണ്ട്.
നഗരത്തിനടുത്ത ഉപ്‌സല അപ്പാര്‍ട്‌മെന്‍റില്‍വച്ചാണ് യുവതിയെ പീഡിപ്പിക്കാന്‍ മൂന്നംഗസംഘം ശ്രമിച്ചത്. ഫേസ്ബുക്ക് ഗ്രൂപ്പിലൂടെ പുറത്തുവിട്ട വീഡിയോ ശ്രദ്ധയില്‍പ്പെട്ട അംഗങ്ങളാണ് പോലീസില്‍ വിവരം നല്‍കിയത്. 60,000 അംഗങ്ങളാണ് ഈ ഗ്രൂപ്പിലുണ്ടായിരുന്നത്.
കുറ്റകൃത്യത്തില്‍ ഉള്‍പ്പെട്ടവരെ അറസ്റ്റ് ചെയ്ത പോലീസ് വീഡിയോ നവമാധ്യമങ്ങളില്‍ പ്രചരിപ്പിക്കരുതെന്ന് അഭ്യര്‍ഥിച്ചിട്ടുണ്ട്. വിഡിയോ റിപ്പോര്‍ട്ട് ചെയ്യപ്പെട്ടതിനെ തുടര്‍ന്ന് ഉടന്‍ നീക്കം ചെയ്തതായും അന്വേഷണ ഉദ്യോഗസ്ഥരോട് സഹകരിക്കുമെന്നും ഫേസ്ബുക്ക് അധികൃതര്‍ വ്യക്തമാക്കി.
