കോട്ടയം: കോവിഡ്-19 പ്രതിരോധവുമായി ബന്ധപ്പെട്ട നിയന്ത്രണങ്ങൾ നിലവിലുള്ളതിനാൽ കോട്ടയം ജില്ലയിൽനിന്ന് സംസ്ഥാനത്തിന് പുറത്തേക്കോ തിരികെയോ യാത്ര ചെയ്യുന്നതിന് അടിയന്തര സാഹചര്യങ്ങളിൽ മാത്രമാണ് അനുമതി നൽകുകയെന്ന് ജില്ലാ കളക്ടർ അറിയിച്ചു.
പ്രസവ ചികിത്സ ആവശ്യമുള്ള ഗർഭിണികൾ, അടുത്ത ബന്ധുവിന്‍റെ മരണവുമായി ബന്ധപ്പെട്ടോ മരണാസന്നരായ അടുത്ത ബന്ധുക്കളെ ശുശ്രൂഷിക്കുന്നതിനോ യാത്ര ചെയ്യേണ്ടവർ, ഗുരുതര രോഗങ്ങൾക്ക് ചികിത്സ വേണ്ടവർ എന്നിവർക്കാണ് മതിയായ രേഖകളുടെ അടിസ്ഥാനത്തിൽ അനുമതി നൽകുക.
അടിയന്തരമല്ലാത്ത ആവശ്യങ്ങൾക്കായി മറ്റു ജില്ലകളിലേക്കും തിരിച്ചും യാത്രാനുമതി തേടുന്നതും ഒഴിവാക്കണമെന്ന് കളക്ടർ നിർദേശിച്ചു. അടിയന്തര യാത്ര ആവശ്യമുള്ളവർ http://covid19jag ratha.kerala.nic.in എന്ന വെബ്സൈറ്റ് മുഖേനയാണ് അപേക്ഷ സമർപ്പിക്കേണ്ടത്.
അക്ഷയ കേന്ദ്രങ്ങൾ
കോട്ടയം: ജില്ലയിലെ അക്ഷയ കേന്ദ്രങ്ങൾ പ്രവർത്തിക്കുന്നതിന് അനുമതി നൽകിയിട്ടുണ്ട്. കൊറോണ പ്രതിരോധ നിർദേശങ്ങൾ കർശനമായി പാലിക്കാൻ അക്ഷയ സംരംഭകരും പൊതുജനങ്ങളും ശ്രദ്ധിക്കണമെന്ന് ജില്ലാ കളക്ടർ അറിയിച്ചു.
