തൃശൂർ: സംസ്ഥാന സ്കൂൾ കലോത്സവത്തിന്റെ ലോഗോ പ്രകാശനം ചെയ്തു. തൃശൂർ മോഡൽ ഗേൾസ് ഹൈസ്കൂളിൽ നടന്ന ചടങ്ങിൽ കെ.വി. അബ്ദുൾഖാദർ എംഎൽഎയാണു ലോഗോ പ്രകാശനം ചെയ്തത്. കണ്ണൂർ പയ്യന്നൂർ ബോയ്സ് സ്കൂളിലെ ചിത്രകല അധ്യാപകൻ സൈമണ്‍ പയ്യന്നൂരാണു ലോഗോ രൂപകല്പന ചെയ്തത്. 58-ാമതു സംസ്ഥാന കലാമേളയുടേയും പൂരനാടിന്‍റേയും സാംസ്കാരിക ചിഹ്നങ്ങൾ ലോഗോയിൽ സന്നിവേശിപ്പിച്ചിട്ടുണ്ട്. എഴുപതോളം ലോഗോകളിൽനിന്നാണു സൈമണ്‍ പയ്യന്നൂരിന്‍റെ ലോഗോ കലോത്സവത്തിനായി തെരഞ്ഞെടുത്തത്.
കലാമേളയുടെ സംഘാടക സമിതി ഓഫീസ് മന്ത്രി വി.എസ്. സുനിൽകുമാർ ഉദ്ഘാടനം ചെയ്തു. എംഎൽഎമാരായ കെ.യു. അരുണൻ, കെ. രാജൻ, യു.ആർ. പ്രദീപ് എന്നിവർ യോഗത്തിൽ പങ്കെടുത്തു. മേയർ അജിത ജയരാജൻ അധ്യക്ഷയായി. പൊതു വിദ്യാഭ്യാസ ഡയറക്ടർ കെ.വി. മോഹൻകുമാർ, ജില്ലാ വിദ്യാഭ്യാസ ഓഫീസർ കെ. സുമതി, സബ് കളക്ടർ രേണുരാജ് എന്നിവർ പങ്കെടുത്തു.
