ജീവിതത്തിൽ വളരെ അപൂർവമായി ലഭിക്കുന്ന ഭാഗ്യമാണ് ലോട്ടറി അടിക്കുക എന്നത്. എന്നാൽ ക്രിസ്മസിന് അതുപോലെ ഒരു സർപ്രൈസ് കിട്ടിയത് ജർമ്മനിയിൽ നിന്നുള്ള ഒരു യുവതിക്കാണ്. ആഘോഷങ്ങളുടെ ഭാഗമായി വീട് വൃത്തിയാക്കുന്നതിനിടെയാണ് ഞെട്ടിക്കുന്ന ആ കാഴ്ച അവർ കണ്ടത്. ഒരു ലോട്ടറി ടിക്കറ്റായിരുന്നു അവർക്ക് ലഭിച്ചത്.
അതും രണ്ട് വർഷം മുമ്പെടുത്ത ലോട്ടറി ടിക്കറ്റാണ് ഇത്. ഒരു ഡ്രോയറിന്‍റെ അകത്തുനിന്നാണ് അവർക്ക് ആ ടിക്കറ്റ് കിട്ടിയത്. അപ്പോൾ തന്നെ ടിക്കറ്റ് പരിശോധിക്കുകയും ചെയ്തു. അത്ഭുതമെന്നു പറയട്ടെ ആ ലോട്ടറി ടിക്കറ്റിന് സമ്മാനമുണ്ടായിരുന്നു. $110,000, അതായത് ഇന്ത്യൻരൂപ 91 ലക്ഷത്തിന് മുകളിൽ വരും ഈ സമ്മാനത്തുക.
2021 ഫെബ്രുവരിയിൽ എടുത്ത ലോട്ടറി സൂപ്പർ 6 ലാണ് ഇവർക്ക് സമ്മാനം ലഭിച്ചിരിക്കുന്നത്. രണ്ട് വർഷത്തിന് ശേഷം സമ്മാനം കിട്ടുമോ എന്നാണെങ്കിൽ അവർക്ക് ആ സമ്മാനം കിട്ടുക തന്നെ ചെയ്തു.
അതേസമയം അവിടുത്തെ ഏറ്റവും വലിയ സമ്മാനത്തുകയായ $660,000 (അഞ്ച് കോടിക്ക് മുകളിൽ രൂപ) ലോട്ടറിയടിച്ച ആൾ ഇതുവരെ സമ്മാനം കൈപ്പറ്റിയിട്ടില്ലത്രെ. 2024 ഡിസംബർ 31 വരെ ലോട്ടറി ടിക്കറ്റ് നൽകി സമ്മാനം വാങ്ങാൻ സമയമുണ്ട്. എന്നാലും ഈ അഞ്ച് കോടിയുടെ നിധി എവിടാകും മറഞ്ഞിരിക്കുകയെന്നാണ് ഇവിടുള്ളവരുടെ സംശയം.
