പത്തനംതിട്ട: വിവാഹവാഗ്ദാനം നല്‍കി യുവതിയെ പീഡിപ്പിച്ച കേസില്‍ രണ്ടു പേരെ പോലീസ് അറസ്റ്റു ചെയ്തു. മെഴുവേലി സ്വദേശിനിയുടെ പരാതിയില്‍ തിരുവനന്തപുരം സ്വദേശികളാണ് അറസ്റ്റിലായത്.
തിരുവനന്തപുരം പൗഡിക്കോണം കേരളാദിത്യപുരം ബഥേല്‍ ഹൗസില്‍ വി.എസ്. അമല്‍ (25), നാലാഞ്ചിറ വയമ്പകോണം അവിട്ടം വീട്ടില്‍ ജെ.എസ്. അതുല്‍ (24) എന്നിവരാണ് അറസ്റ്റിലായത്.
ട്രെയിന്‍ യാത്രയ്ക്കിടെ അമല്‍ പരിചയപ്പെട്ട യുവതിയെ വിവാഹ വാഗ്ദാനം നല്‍കി ബംഗളൂരുവിലെത്തിച്ച് യുവതിയെ അതുലുമായി ചേര്‍ന്ന് പീഡിപ്പിച്ചുവെന്നാണ് പരാതി.
പിന്നീടു മുങ്ങിയ പ്രതികള്‍ പല സ്ഥലങ്ങളിലായി ഒളിവില്‍ കഴിഞ്ഞു. ഇവര്‍ മൊബൈല്‍ നമ്പര്‍ മാറി ഉപയോഗിച്ചതിനാല്‍ കണ്ടെത്താന്‍ ബുദ്ധിമുട്ടായെന്നു പോലീസ് പറഞ്ഞു.
ജില്ലാ പോലീസ് മേധാവിയുടെ നിര്‍ദേശപ്രകാരം പോലീസ് പ്രത്യേക അന്വേഷണസംഘം രൂപീകരിച്ചിരുന്നു.അമലിനെ തുമ്പയില്‍ നിന്നും അതുലിനെ നാലാഞ്ചിറയില്‍ നിന്നുമാണ് പിടികൂടിയത്. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു.
