പ്രണയിക്കുന്നവര്‍ക്കും അവരുടെ പ്രണയ സാക്ഷാത്കാരത്തിനും ഒരു കൈത്താങ്ങായി കൊച്ചിയില്‍ നിന്നൊരു സംഘടന. ‘ഒന്നാകാന്‍ ഒന്നിക്കാം’ എന്ന സന്ദേശത്തോടെ രൂപംകൊണ്ട ‘മിത്രകുല’ത്തിന്റെ പ്രധാന ലക്ഷ്യം പ്രണയിച്ചതിന്റെ പേരില്‍ ആരും ഒറ്റപ്പെടാനോ കഷ്ടതയനുഭവിക്കാനോ പാടില്ല എന്നതാണ്. ഹ്യൂമന്‍ വെല്‍നസ് സ്റ്റഡിസെന്ററിന്റെ നേതൃത്വത്തിലാണ് സംഘടന പ്രവര്‍ത്തിക്കുന്നത്.
വിവാഹിതരല്ലെങ്കിലും പ്രായപൂര്‍ത്തിയായവര്‍ക്ക് ഒന്നിച്ചുജീവിക്കാമെന്ന് ഹൈക്കോടതി അടുത്തിടെ പുറപ്പെടുവിച്ച ഉത്തരവും കൂട്ടായ്മയ്ക്ക് പ്രേരകമായിട്ടുണ്ട്. രണ്ടുപേരുടെ ജീവിതത്തെയും സമൂഹത്തെയും ബാധിക്കുന്നതെന്ന നിലയില്‍ വളരെ ഗൗരവമായാണ് ഇതിനെ സമീപിക്കുന്നത്.
പ്രണയിക്കുന്നവര്‍ക്കും പ്രണയം നഷ്ടപ്പെട്ടവര്‍ക്കും പ്രണയം അന്വേഷിക്കുന്നവര്‍ക്കും പ്രണയത്തിന് കൈത്താങ്ങും നിയമസഹായവും ആവശ്യമുള്ളവര്‍ക്കും സമീപിക്കാം.
തൊഴില്‍നേടിയെടുക്കാന്‍ സഹായിക്കുകയും പരാശ്രയമില്ലാതെ ജീവിക്കാനുള്ള സാഹചര്യവും സംഘടന ഒരുക്കുന്നു. എല്ലാ നാലാമത്തെ ഞായറാഴ്ചയും മിത്രകുലത്തില്‍ ഈ കൂട്ടായ്മ ചേരും. വിശദവിവരങ്ങള്‍ക്ക് ഫോണ്‍: 9447498430.
