തലയോലപ്പറന്പ്: സ്കൂൾ യൂണിഫോം ധരിച്ചെത്തുന്ന വിദ്യാർഥിനികൾ ഇടയ്ക്കുവച്ച് യൂണിഫോം മാറി കളർ ഡ്രസ്ധരിച്ച് പൂവാലൻമാരുടെ ബൈക്കിൽ കയറി കറങ്ങി നടക്കുന്നത് പതിവാകുന്നു. തലയോലപ്പറന്പ് ബ്സസ്റ്റാൻഡിലെ ബാത്ത്റൂമിൽ കയറിയാണ് ഡ്രസുകൾ മാറുന്നത്.
രാവിലെ യൂണിഫോം മാറി പോകുന്ന വിദ്യാർഥിനികൾ വൈകുന്നേരം നാലോടെ തിരിച്ചെത്തി വീണ്ടും സ്കൂൾ യൂണിഫോം ധരിച്ചുമടങ്ങും. ഇത്തരത്തിൽ വിദ്യാർഥിനികൾ പോകുന്നത് ശ്രദ്ധയിൽ പെട്ട യാത്രക്കാരിൽ ചിലർ തലയോലപ്പറമ്പ് പോലീസിനെ വിവരമറിയിച്ചെങ്കിലും കാര്യമായ ഫലമില്ലന്ന ആരോപണമുണ്ട്.
മോഹന വാഗ്ദാനങ്ങൾ നൽകി പ്രായപൂർത്തിയാകാത്ത പെണ്‍കുട്ടികളെ ബൈക്കിൽകയറ്റി കൂട്ടിക്കൊണ്ടുപോകുന്ന പൂവാലൻമാർക്കെതിരെ നിയമ നടപടികൾ സ്വീകരിക്കണമെന്ന് നാട്ടുകാർ ആവശ്യപ്പെട്ടു. സ്കൂൾ സമയങ്ങളിൽ ബസ് സ്റ്റാൻഡിൽ വർധിച്ചുവരുന്ന പൂവാലശല്യം നിയന്ത്രിക്കാൻ ഇവിടെ പോലീസുകാരെ ഡ്യൂട്ടിക്കിടണമെന്ന ആവശ്യവും ശക്തമാണ്.
