തൃശൂർ: വിഷുത്തലേന്നും, ഈസ്റ്റർ തലേന്നും സംസ്ഥാനത്ത് ഏറ്റവുമധികം മദ്യവിൽപന നടന്നതു തൃശൂരിൽ. കണ്‍സ്യൂമർ ഫെഡിന്‍റെ പൂത്തോളിലെ മദ്യസൂപ്പർമാർക്കറ്റിൽ വ്യാഴാഴ്ച ഒരു കോടി ഒരു ലക്ഷവും, ശനിയാഴ്ച 89 ലക്ഷം രൂപയുടെ മദ്യവുമാണ് വിറ്റഴിച്ചത്. 82 ലക്ഷം രൂപയുടെ മദ്യം വിറ്റ കോഴിക്കോട് ഒൗട്ട്‌ലെറ്റാണു വില്പനയിൽ രണ്ടാംസ്ഥാനത്ത്.
ദേശീയ-സംസ്ഥാന പാതയോരത്തുനിന്നും 500 മീറ്റർ ദൂര പരിധി നിശ്ചയിച്ച സുപ്രീംകോടതി വിധിക്കു ശേഷമെത്തിയ ആദ്യ അവധി ആഘോഷങ്ങളായിരുന്നു വിഷുവും ഈസ്റ്ററും. കഴിഞ്ഞ ഓണക്കാലത്ത് എറണാകുളം വൈറ്റിലയിലെ ഒൗട്ട്‌ലെറ്റിൽ 1.2 കോടിയുടെ വിൽപ്പന നടന്നതാണ് ഇതുവരെയുള്ള ഉയർന്ന വിൽപ്പന.
