കോട്ടയം: കോട്ടയം നഗരം കഞ്ചാവ്, മയക്കുമരുന്ന്, മദ്യപാനികളുടെ വിഹാരകേന്ദ്രമാകുന്നു. തിരുനക്കര മൈതാനം, പഴയ പോലീസ് സ്റ്റേഷൻ മൈതാനം, പഴയ ബസ് സ്റ്റാൻഡ്, നാഗന്പടം സ്റ്റാൻഡ്, നെഹ്റു സ്റ്റേഡിയം, വാഹന പാർക്കിംഗ് കേന്ദ്രങ്ങൾ തുടങ്ങി നിരവധി സ്ഥലങ്ങൾ മദ്യപാനികളുടെയും അഴിഞ്ഞാട്ടക്കാരുടെയും താവളമാകുന്നത്.
സന്ധ്യമയങ്ങിയാൽ നഗരത്തിലൂടെ നടന്നു പോകുവാൻ സാധിക്കാത്ത അവസ്ഥയാണ്. എവിടെയും മദ്യപാനികളാണ്. പഴയ ബസ് സ്റ്റാൻഡിലും സമീപപ്രദേശങ്ങളിലും പകൽ സമയത്തും പൊതുസ്ഥലത്ത് മദ്യപിക്കുന്നവരുമുണ്ട്. തിരുനക്കര മൈതാനത്തെ സ്റ്റേജ്, ഇരിപ്പിടങ്ങൾ എന്നിവിടങ്ങളിൽ മദ്യക്കുപ്പികൾ കൂന്പാരമാണ്.
പഴയ കൽപ്പന സൂപ്പർ മാർക്കറ്റിനു മുന്നിൽ ഭിക്ഷാടകരായി ഇരിക്കുന്നവർ ഇവിടെ ഇരുന്നു മദ്യപിക്കുന്നതും കാണാം. ഇവിടെയുള്ള നടപ്പാതകളിൽ ഭക്ഷണ അവശിഷ്ടം ഉൾപ്പെടെയുള്ള മാലിന്യം തള്ളുന്നതും വഴിയാത്രക്കാർക്ക് ബുദ്ധിമുട്ട് സൃഷ്ടിക്കുന്നുണ്ട്.
