പൃഥ്വിരാജ് -ഷാജോണ് കൂട്ടുകെട്ടിൽ ഒരുങ്ങുന്ന ചിത്രമാണ് ബ്രദേഴ്സ് ഡേ. ഓണം റിലീസായി എത്തുന്ന ചിത്രത്തിന്‍റെ രചനയും സംവിധാനവും നിർവഹിക്കുന്നത് നടൻ ഷാജോണ് തന്നെയാണ്. ചിത്രത്തിലെ പുതിയ കാരക്ടർ പോസ്റ്റർ പുറത്തു വന്നിരിക്കുകയാണ്.
മഡോണ സെബാസ്റ്റ്യന്‍റെ കാരക്ടർ പോസ്റ്ററാണ് പുറത്തു വന്നിരിക്കുന്നത്. സാരിയിൽ അതിസുന്ദരിയായാണ് മഡോണ വന്നിരിക്കുന്നത്. ജെമ എന്ന കഥപാത്രത്തെയാണ് താരം അവതരിപ്പിക്കുന്നത്. ചിത്രത്തിന്‍റെ ടീസറിനും ഫസ്റ്റ്‌ലുക്ക് പോസ്റ്ററിനും മികച്ച പ്രേക്ഷക സ്വീകാര്യതയാണ് ലഭിച്ചിരുന്നത്.
കോമഡിയും ആക്ഷനും ചേർന്ന എന്‍റർടെയ്നർ ചിത്രമായിരിക്കുമെന്നാണ് ടീസർ നൽകുന്ന സൂചന. പ്രേംനസീറിനെ പൃഥ്വിരാജ് അനുകരിക്കുന്നതും പെണ്‍വേഷത്തിൽ ധർമജൻ ബോൾഗാട്ടിയിലെത്തുന്നതും ഉൾപ്പെടെയുള്ള രസകരമായ രംഗങ്ങളായിരുന്നു ടീസറിൽ.
പൃഥ്വിരാജിനെ കൂടാതെ ഐശ്വര്യ ലക്ഷ്മി, മിയ, പ്രയാഗ മാർട്ടിൻ, മഡോണ സെബാസ്റ്റ്യൻ, ധർമജൻ, വിജയരാഘവൻ എന്നിവരും ചിത്രത്തിൽ പ്രധാനകഥാപാത്രങ്ങളായി എത്തുന്നുണ്ട്. മാജിക് ഫ്രെയിംസിന്‍റെ ബാനറിൽ ലിസ്റ്റിൻ സ്റ്റീഫൻ നിർമിക്കുന്ന ചിത്രത്തിന്‍റെ ഛായാഗ്രഹണം നിർവഹിക്കുന്നത് ജിത്തു ദാമോദറാണ്.
