സ്വന്തം ലേഖകൻ
തൃശൂർ: കോവിഡ് ബോധവത്കരണത്തിനായി കേരള പോലീസ് പുറത്തിറക്കിയ പുതിയ ഡാൻസ് വീഡിയോ സോഷ്യൽ മീഡിയയിൽ വൻഹിറ്റ്.
മഹാമാരിയെ ഒത്തൊരുമിച്ചു നേരിടാം, കേരള പോലീസ് എപ്പോഴും നിങ്ങളോടൊപ്പം എന്ന ടാഗ് ലൈനോടെയാണ് ഒരു മിനിറ്റ് 28 സെക്കൻഡ് ദൈർഘ്യമുള്ള ഡാൻസ് വീഡിയോ.
കോവിഡ് സമയത്തു മാസ്കണിയണമെന്നും തട്ടാതെയും മുട്ടാതെയും നോക്കി അകലം പാലിച്ചു നിൽക്കണമെന്നും സാനിറ്റൈസർ ഉപയോഗിക്കണമെന്നും ഡാൻസ് വീഡിയോയിലൂടെ പറയുന്നു.
യൂണിഫോമണിഞ്ഞ പോലീസുകാരാണ് പാട്ടുംപാടി ആടിത്തിമർക്കുന്നത്. വനിതാ പോലീസുകാരും ഒപ്പമുണ്ട്.
രാത്രിയുടെ ഭംഗിയിൽ പോലീസ് ജീപ്പിന്‍റെ ബീക്കണെല്ലാം ഓണ്‍ ചെയ്ത വെളിച്ചത്തിൽ കുളിച്ചാണ് ഡാൻസ് മുന്നേറുന്നത്. വാക്സിനേഷൻ എടുക്കണമെന്നോർമിപ്പിച്ച് ശുഭപ്രതീക്ഷയോടെയാണ് വീഡിയോ അവസാനിക്കുന്നത്.
സ്റ്റേറ്റ് പോലീസ് മീഡിയ സെന്‍റർ ഡെപ്യൂട്ടി ഡയറക്ടർ വി.പി. പ്രമോദ് കുമാറാണ് സംവിധാനം.
ആദിത്യ എസ്. നായർ, രജീഷ് ലാൽ വംശ എന്നിവരുടെ വരികൾ ആലപിച്ചിരിക്കുന്നത് നഹൂം ഏബ്രഹാം, നിള ജോസഫ് എന്നിവരാണ്.
പ്രണവ് പ്രാണ്‍, പാർവതി പ്രാണ്‍ എന്നിവരാണ് കോറിയോഗ്രഫി.
പോലീസുകാരായ ജിനു തോമസ്, ഐശ്വര്യ സാബു, ക്രിസ്റ്റി ജേക്കബ്, ഇൻഡിയ നെൽസണ്‍, വി.ജെ. ജയകൃഷ്ണൻ, റോസ്മേരി സാജൻ, കെ.ഷൈൻ റോസ്, എസ്. അഖിൽജിത്ത്, ആർ.എസ്. പ്രദീപ് കുമാർ എന്നിവരാണ് പ്രഫഷണൽ ഡാൻസർമാരെ വെല്ലുംവിധം പാട്ടിനൊത്തു ചുവടുവച്ചിരിക്കുന്നത്.
ഹേമന്ത് ആർ. നായർ, ഷിഫിൻ സി. രാജ്, സി.പി. രാജീവ് എന്നിവരാണ് കാമറ. എഡിറ്റിംഗും മിക്സിംഗും ഹേമന്ത് ആർ. നായർ തന്നെ നിർവഹിച്ചിരിക്കുന്നു.
