മുംബൈ: മഹാരാഷ്ട്രയിൽ വിജയം ഉറപ്പെന്ന വിലയിരുത്തലിൽ ഇരുമുന്നണികളും. ഭരണത്തുടർച്ച ഉണ്ടാകുമെന്ന് മഹായുതി സഖ്യം അവകാശപ്പെടുമ്പോൾ, ഭരണമാറ്റവും ലോക്സഭാ തെരഞ്ഞെടുപ്പിന്‍റെ ആവർത്തനവും ഇത്തവണ ഉണ്ടാകുമെന്നാണ് ഇന്ത്യ മുന്നണിയുടെ അവകാശവാദം.
വിവിധ എക്സിറ്റ്പോളുകളെ അടിസ്ഥാനപ്പെടുത്തിയാണ് രണ്ടു മുന്നണികളും ഈ നിഗമനത്തിൽ എത്തിയിരിക്കുന്നത്. തെരഞ്ഞെടുപ്പ് കമ്മീഷന്‍റെ അവസാന റിപ്പോർട്ട് പ്രകാരം 59.30 ആണ് മഹാരാഷ്ട്രയിലെ പോളിംഗ് ശതമാനം. 2019ൽ ഇത് 61.4 ശതമാനം ആയിരുന്നു.
മഹാരാഷ്ട്രയിൽ എൻഡിഎയ്ക്ക് 152നും 160നും ഇടയിൽ സീറ്റുകൾ കിട്ടുമെന്നാണ് ടുഡേയ്സ് ചാണക്യയുടെ പ്രചാരണം. ചില പ്രവചനങ്ങൾ ഇന്ത്യാ മുന്നണിക്കും മുൻതൂക്കം നൽകിയിട്ടുണ്ട്. പിളര്‍പ്പിനുശേഷം ശക്തി തെളിയിക്കേണ്ടതിനാല്‍ എൻസിപിക്കും ശിവസേനയ്ക്കും ഈ തെരഞ്ഞെടുപ്പ് നിര്‍ണായകമാണ്.
അതേസമയം ഇഞ്ചോടിഞ്ച് പോരാട്ടം നടന്ന ജാർഖണ്ഡിൽ അധികാരമുറപ്പിക്കാൻ ബിജെപിയും ജാർഖണ്ഡ് മുക്തി മോർച്ചയും ചില വിമത സ്ഥാനാർഥികളെ ബന്ധപ്പെടുകയാണെന്നു സൂചനയുണ്ട്. മറ്റന്നാളാണു വോട്ടെണ്ണൽ. വോട്ടെണ്ണൽ കേന്ദ്രങ്ങളിൽ നിരീക്ഷണം കർശനമാക്കാൻ കോൺഗ്രസ് നേതൃത്വം നിർദേശം പ്രവർത്തകർക്ക് നിർദേശം നല്കി.
