മാവേലിക്കര: സ്കൂട്ടറിലെത്തി കാൽനട യാത്രികയുടെ ബാഗ് പിടിച്ചുപറിച്ച കള്ളനെ നാട്ടുകാർ പിടികൂടി പോലീസിനു കൈമാറി. ചെട്ടികുളങ്ങര പേള തറയിൽ വീട്ടിൽ വർഗീസാ(44) ണ് പിടിയിലായത്. ഇന്നലെ രാവിലെ 9.45 ഓടെ ബിഎസ്എൻഎൽ ഓഫീസിനു സമീപത്തുകൂടി നടന്നു വരികയായിരുന്ന തിരുവനന്തപുരം നെടുമങ്ങാട് സ്വദേശിയും മാവേലിക്കരയിൽ വീട്ടുജോലികൾ ചെയ്തു വന്നിരുന്ന സജിതയു(30)ടെ ബാഗാണ് ഇയാൾ കവർന്നത്.
സജിതയുടെ കരച്ചിൽകേട്ട് നാട്ടുകാരായ ബൈക്കുയാത്രക്കാർ ഇയാളെ പിന്തുടർന്നു. ഇവരെ കണ്ട് വർഗീസ് സ്കൂട്ടറിൽ അമിത വേഗത്തിൽ പോയതോടെ നിയന്ത്രണം വിട്ട് റെയിൽവേ സ്റ്റേഷനു സമീപത്തെ വീടിന്‍റെ മതിലിൽ ഇടിക്കുകയായിരുന്നു. തുടർന്ന് നാട്ടുകാർ ചേർന്ന് ഇയാളെ പിടികൂടുകയും പോലീസിനു കൈമാറുകയുമായിരുന്നു. മാവേലിക്കര പോലീസ് കേസെടുത്തു.
