പത്തും ഇരുപതും സിനിമകൾ നടക്കുന്നിടത്ത് അകെ അഞ്ച് സിനിമകൾ മാത്രമാണ് ഇപ്പോൾ നടക്കുന്നത്. ഇത്തരം സാഹചര്യങ്ങൾ കൂടുതൽ ഇത് ബാധിക്കുന്നത് ദിവസേന വേതനത്തിന് ജോലി ചെയ്യുന്ന തൊഴിലാളികളെയാണെന്ന് മാലാ പാർവതി. എത്ര മേക്കപ്പ് ആർട്ടിസ്റ്റുമാരും ഹെയർ സ്റ്റൈലിസ്റ്റുമാരുമാണ് എന്നെ വിളിക്കാറുള്ളത്. ജോലിയില്ല, പേഴ്സണൽ അസിസ്റ്റന്റായി നിർത്താമോയെന്നൊക്കെ ചോദിച്ചിട്ട്. അത്രയും മോശമാണ് അവസ്ഥ.
എനിക്ക് തൊഴിലുണ്ടായാൽ അല്ലേ മറ്റൊരാളെ ജോലിക്ക് എടുക്കാൻ കഴിയുകയുള്ളൂ. മുൻ നിര അഭിനേതാക്കളുടെ പ്രതിഫലം കൂടുതൽ എന്ന തരത്തിൽ നിർമാതാക്കളുടെ സംഘടന സംസാരിക്കുമ്പോൾ ഞങ്ങളെ പോലുള്ള ആർട്ടിസ്റ്റുമാരെ മനുഷ്യരെന്ന പരിഗണന പോലും നൽകുന്നില്ല. ആർട്ടിസ്റ്റുമാരുടെ പ്രതിഫലം എന്നിവർ പൊതുവെ പറയുമ്പോൾ അതിൽ മുൻനിര അഭിനേതാക്കളെ മാത്രമേ അവർ ഉൾപ്പെടുത്തുന്നുള്ളൂ.
അപ്പോൾ ഞങ്ങൾ ആരാണ്, മുൻ നിര താരങ്ങൾ പ്രതിഫലം കൂട്ടുമ്പോൾ ഞങ്ങളെ പോലുള്ളവരുടെ പ്രതിഫലം കുറയുകയാണെന്ന് ഞങ്ങളെക്കാൾ കൂടുതൽ അവർക്ക് അറിയാം. എന്നിട്ടും അവർ ജനറലൈസ് ചെയ്തതാണ് പറയുന്നത്. പല സിനിമകളിൽ നിന്ന് ഇനിയും പൈസ കിട്ടാനുണ്ട്. വേണമെങ്കിൽ നമുക്ക് പരാതി കൊടുക്കാം. പക്ഷേ അവരുടെ ചില സാഹചര്യങ്ങൾ അറിയുമ്പോൾ നമ്മൾ വിട്ടു കളയും. അതുപോലെ മാർക്കറ്റ് വാല്യൂ സ്റ്റാറുകൾക്ക് പറയാം. പക്ഷേ ഞങ്ങളെ പോലുള്ള ആർട്ടിസ്റ്റ്മാർക്ക് ഞങ്ങളുടെ വില പറയാൻ സാധിക്കാറില്ല. അവരെന്ത് വിലയാണ് പറയാറുള്ളത് അതിന് ഓകെ പറയുക മാത്രമേ ഞങ്ങൾക്ക് സാധിക്കുകയുള്ളൂ എന്ന് മാലാ പാർവതി പറഞ്ഞു.