തെന്നിന്ത്യന്‍ സിനിമയിലെ യഥാര്‍ത്ഥ ഹീറോ യഥാര്‍ത്ഥ സൂപ്പര്‍ താരം മമ്മൂട്ടിയാണെന്ന് പറഞ്ഞിരിക്കുകയാണ് തമിഴ് ചലച്ചിത്ര താരം ജ്യോതിക. ഞാന്‍ ദക്ഷിണേന്ത്യയിലെ ഒട്ടുമിക്ക സൂപ്പര്‍താരങ്ങളോടൊപ്പവും അഭിനയിച്ചിട്ടുണ്ട്. എങ്കിലും എനിക്കിത് പറയാതിരിക്കാന്‍ വയ്യ. മമ്മൂട്ടി ആണ് യഥാര്‍ഥ സൂപ്പര്‍സ്റ്റാര്‍.
കാതലില്‍ അഭിനയിക്കാന്‍ പോയ സമയത്ത് ആദ്യമായി അദ്ദേഹത്തെ കണ്ടപ്പോള്‍ ഞാന്‍ ചോദിച്ചു. സര്‍ അങ്ങ് എങ്ങനെയാണ് ഇത്തരമൊരു കഥാപാത്രം തിരഞ്ഞെടുത്തത്? അദ്ദേഹം എന്നോട് തിരിച്ചൊരു ചോദ്യം ചോദിച്ചു. ആരാണ് യഥാര്‍ഥ നടന്‍? യഥാര്‍ഥ നായകന്‍ വില്ലനെപോയി ഇടിക്കുകയോ, ആക്ഷന്‍ ചെയ്യുകയോ, പ്രണയരംഗങ്ങളില്‍ അഭിനയിക്കുകയോ മാത്രം ചെയ്യുന്ന ആളായിരിക്കരുത്.
പ്രശ്‌നങ്ങള്‍ പരിഹരിച്ചുകൊണ്ട് വിടവുകള്‍ നികത്തുന്ന വ്യക്തി കൂടി ആയിരിക്കണം യഥാര്‍ഥ നായകന്‍ എന്ന്. അദ്ദേഹത്തിന് കൈയടി കൊടുത്തേ മതിയാകൂ. കാരണം ഈ കഥാപാത്രം വിജയിച്ചില്ലെങ്കില്‍ അദ്ദേഹത്തിന് നഷ്ടപ്പെടാന്‍ ഒരുപാടുണ്ടായിരുന്നു. കാരണം അത്തരമൊരു ഉന്നതിയിലാണ് അദ്ദേഹം ഇപ്പോഴുളളതെന്ന് ജ്യോതിക പറഞ്ഞു. ഫിലിം കംപാനിയന്‍ നടത്തിയ അഭിനേതാക്കളുടെ സംവാദത്തിലാണ് ജ്യോതിക മമ്മൂട്ടിയെ ഇങ്ങനെ വിശേഷിപ്പിച്ചത്. നടന്‍ സിദ്ധാര്‍ത്ഥും ജ്യോതികയുടെ അഭിപ്രായത്തെ പിന്തുണച്ചു.
