കഴക്കൂട്ടം: ഹോട്ടല്‍ തൊഴിലാളികളായ ഇതര സംസ്ഥാന വനിതകള്‍ താമസിക്കുന്ന വീടിനു മുന്നിലെത്തി മുഖം മറച്ചു നഗ്‌നതാപ്രദര്‍ശനം നടത്തുന്നതു പതിവാക്കിയ സിഐടിയു യൂണിയനില്‍പെട്ട ചുമട്ടുതൊഴിലാളി പിടിയില്‍. കഴക്കൂട്ടം റെയില്‍വേ ക്വാര്‍ട്ടേഴ്‌സിനു സമീപം മണക്കാട്ടുവിള വീട്ടില്‍ ഷിബു(28)വാണ് കുടുങ്ങിയത്. ഷിബുവിന്റെ ശല്യം സഹിക്കാനാവാഞ്ഞ വനിതകള്‍ തന്നെയാണ് ഇയാളെ വലയിലാക്കിയത്. വനിതകള്‍ താമസിക്കുന്ന വീടിനു മുന്നിലെത്തി രാത്രി ബെല്‍ അമര്‍ത്തുന്നതായിരുന്നു ഇയാളുടെ രീതി.
സ്ത്രീകള്‍ ഇറങ്ങിവരുമ്പോഴാണു നഗ്‌നതാപ്രദര്‍ശനം. തുണികൊണ്ടു മുഖം മൂടുന്നതിനാല്‍ ആളെ പിടികിട്ടിയിരുന്നില്ല. പല ദിവസം ഇത് ആവര്‍ത്തിച്ചതോടെ വനിതകള്‍ ഇയാളുടെ ചിത്രവും ചേഷ്ടകളും മൊബൈല്‍ഫോണ്‍ ക്യാമറയില്‍ പകര്‍ത്തി കഴക്കൂട്ടം സൈബര്‍സിറ്റി അസി. കമ്മിഷണര്‍ക്കു നല്‍കി. ഇതിനു പിന്നാലെയാണു തുമ്പ എസ്‌ഐ അറസ്റ്റ് ചെയ്തത്. കഴക്കൂട്ടം ആറ്റിന്‍കുഴി യൂണിറ്റിലെ ചുമട്ടുതൊഴിലാളിയാണ് ഇയാളെന്നു പൊലീസ് പറഞ്ഞു.
