മംഗളൂരു: പൗരത്വ ഭേദഗതി നിയമത്തിനെതിരായ പ്രതിഷേധത്തിനിടെ കർണാടകയിലെ മംഗളൂരുവിലുണ്ടായ അക്രമ സംഭവങ്ങളിൽ മലയാളികള്‍ക്ക് മംഗളൂരു പോലീസിന്‍റെ നോട്ടീസ്. ഡിസംബര്‍ 19നാണ് അക്രമം നടന്നത്. അന്നേ ദിവസം മംഗളൂരു നഗരപരിധിയിലുണ്ടായിരുന്ന ആയിരത്തോളം മലയാളികൾക്കെതിരേയാണ് പോലീസ് നടപടി.
പോലീസ് സ്റ്റേഷനിൽ നേരിട്ട് ഹാജരാകാനാണ് നിര്‍ദേശം. സ്ത്രീകളും വിദ്യാർഥികളുമുൾപ്പെടെയുള്ള മലയാളികൾക്കാണ് നോട്ടീസ് ലഭിച്ചിരിക്കുന്നതെന്നാണ് വിവരം. ഡിസംബർ 19ന് പൗരത്വ ഭേദഗതി നിയമത്തിനെതിരായ പ്രതിഷേധങ്ങളിലെ അക്രമ സംഭവങ്ങളിൽ നിരവധി കേസുകളാണ് കർണാടക പോലീസ് രജിസ്റ്റർ ചെയ്തിട്ടുള്ളത്.
