കോട്ടയം: ഉപതെരഞ്ഞെടുപ്പിലും മാണി സി. കാപ്പൻ ഇടതു മുന്നണിയുടെ തുറുപ്പു ചീട്ട്. പാലാ ഉപതെരഞ്ഞെടുപ്പോടെ എൽഡിഎഫിന്‍റെ താരമായി മാറിയ മാണി സി. കാപ്പൻ എംഎൽഎയെ അഞ്ച് ഉപതെരഞ്ഞെടുപ്പുകളിലും കളത്തിലിറക്കാൻ ഇടതുമുന്നണിയുടെ തീരുമാനം. ഇന്നലെ കോന്നിയിൽ എൽഡിഎഫ് സ്ഥാനാർഥി കെ.യു. ജനീഷ്കുമാറിന്‍റെ തെരഞ്ഞെടുപ്പ് കണ്‍വൻഷനിലും മാണി സി. കാപ്പനായിരുന്നു താരം.
കണ്‍വൻഷൻ ഉദ്ഘാടനം ചെയ്ത മുഖ്യമന്ത്രി പിണറായി വിജയൻ പാലായിലെ മാണി സി. കാപ്പന്‍റെ വിജയം അഞ്ചു മണ്ഡലത്തിലും ആവർത്തിക്കുമെന്ന് പറഞ്ഞത് ഹർഷാരവത്തോടെയാണ് പ്രവർത്തകർ സ്വീകരിച്ചത്. മാണി സി. കാപ്പന് കോന്നി തെരഞ്ഞെടുപ്പ് കണ്‍വൻഷനിൽ ഉജ്ജ്വല സ്വീകരണവും ലഭിച്ചിരുന്നു.
ഇന്ന് വൈകുന്നേരം നാലിന് അരൂരിൽ എൽഡിഎഫ് സ്ഥാനാർഥി മനു സി. പുളിക്കന്‍റെ തെരഞ്ഞെടുപ്പ് കണ്‍വൻഷനിലും മാണി സി. കാപ്പൻ പങ്കെടുക്കുന്നുണ്ട്. മുഖ്യമന്ത്രിയാണ് കണ്‍വൻഷൻ ഉദ്ഘാടനം ചെയ്യുന്നത്.വട്ടിയൂർകാവ്, മഞ്ചേശ്വരം, അരൂർ, കോന്നി, എറണാകുളം എന്നിവിടങ്ങളിൽ രണ്ടു ദിവസം വീതം പ്രചാരണ പ്രവർത്തനങ്ങളിൽ മാണി സി.കാപ്പൻപങ്കെടുക്കുന്നുണ്ട്.
മഹാരാഷ്്ട്രയിലെ നിയമസഭ തെരഞ്ഞെടുപ്പിലും പ്രചാരണത്തിനെത്താൻ മാണി സി.കാപ്പനോട് എൻസിപി ദേശീയ അധ്യക്ഷൻ ശരത് പവാർ ആവശ്യപ്പെട്ടിട്ടുണ്ട്.
