മാഞ്ചസ്റ്റർ: ഒരു ഗോൾ നേടുകയും ഒരു ഗോളിനു വഴിയൊരുക്കുകയും ചെയ്ത ക്രിസ്റ്റ്യാനോ റൊണാൾഡോയുടെ മികവിൽ മാഞ്ചസ്റ്റർ യുണൈറ്റഡിന് ജയം.
ഇംഗ്ലീഷ് പ്രീമിയർ ലീഗിൽ നാലു മത്സരങ്ങൾക്കുശേഷമാണ് യുണൈറ്റഡിന്‍റെ ജയം. ഈ ജയം പരിശീലകൻ ഒലെ ഗണ്ണർ സോൾഷെയറുടെ ഭാവിക്ക് താത്കാലികമായെങ്കിലും ആശ്വാസം നൽകിയിരിക്കുകയാണ്.
സോൾഷെയറിനു നിർണായകമായ മത്സരത്തിൽ എതിരില്ലാത്ത മൂന്നു ഗോളിനാണ് യുണൈറ്റഡ് ടോട്ടനത്തെ തകർത്തത്. ലീഗിൽ പത്ത് മത്സരങ്ങൾ കഴിഞ്ഞപ്പോൾ ടോട്ടനത്തിന്റെ അഞ്ചാം തോൽവിയായി. ഇതോടെ ആരാധകർ നുനോ എസ്പിരിറ്റോ സാന്‍റോസിനെതിരേ തിരിഞ്ഞു.
39-ാം മിനിറ്റിൽ റൊണാൾഡോ യുണൈറ്റഡിനെ മുന്നിലെത്തിച്ചു. 64-ാം മിനിറ്റിൽ റൊണാൾഡോയുടെ ത്രൂബോളിലൂടെ എഡിൻസണ്‍ കവാനി രണ്ടാം ഗോളും നേടി.
86-ാം മിനിറ്റിൽ മാർക്സ് റഷ്ഫർഡ് യുണൈറ്റഡിന്‍റെ ഗോൾ പട്ടിക പൂർത്തിയാക്കി. ജയത്തോടെ യുണൈറ്റഡ് പത്ത് കളിയിൽ 17 പോയിന്റുമായി അഞ്ചാം സ്ഥാനത്തേക്കു കയറി.
