സ്വന്തം ലേഖകൻ
തൃശൂർ: മണ്ണുത്തി – വടക്കഞ്ചേരി ദേശീയപാതയുടെ പണി ഇത്രയേറെ വർഷം വൈകിയതു യഥാസമയം ഭൂമി ഏറ്റെടുത്തു തരാത്തതിനാലും ഭൂവുടമകൾ നടത്തിയ സമരം മൂലവുമാണെന്നു കരാർ കന്പനിയും ദേശീയപാത അഥോറിറ്റിയും. ഹൈക്കോടതിയിൽ ഫയൽ ചെയ്ത സത്യവാങ്മൂലത്തിലാണ് ഈ വാദം. ദേശീയപാതയുടെ അറ്റകുറ്റപ്പണി അടിയന്തരമായി നടത്തണമെന്നും സുരക്ഷാമാനദണ്ഡങ്ങൾ പാലിക്കണമെന്നും ആവശ്യപ്പെട്ട് കോണ്ഗ്രസ് തൃശൂർ ജില്ലാ ജനറൽ സെക്രട്ടറി അഡ്വ. ഷാജി ജെ. കോടങ്കണ്ടത്ത് ഫയൽ ചെയ്ത ഹർജിയിലാണ് ഈ സ്റ്റേറ്റ്മെന്‍റ് സമർപ്പിച്ചത്.
സമരങ്ങൾക്കു പുറമേ, വിട്ടുതന്ന സ്ഥലത്തിനു കൂടുതൽ വില ആവശ്യപ്പെട്ടുള്ള കേസുകളും ഉണ്ടായിരുന്നു. ഇതുമൂലം പണി നടത്താനായില്ല. ഭൂമി ഏറ്റെടുത്തുതരേണ്ടതു സംസ്ഥാന സർക്കാരിന്‍റെ ഉത്തരവാദിത്വമാണ്. കരാർ കന്പനി ഹൈക്കോടതിയെ സമീപിച്ച് പോലീസ് സംരക്ഷണം വാങ്ങിയാണ് അന്നു പണി നടത്തിയത്. പോലീസ് സംരക്ഷണത്തിന്‍റെ ഉത്തരവ് ഹൈക്കോടതിയിൽനിന്നു ലഭിച്ചിട്ടും സംസ്ഥാന സർക്കാർ കൃത്യമായി പോലീസ് സംരക്ഷണം നൽകിയില്ലെന്നും കന്പനി ആരോപിച്ചു.
2013 ഏപ്രിൽ ആറിനു പണി പൂർത്തിയാക്കേണ്ടതായിരുന്നു. എന്നാൽ 2011 നവംബർവരെ ഭൂമി ഏറ്റെടുക്കലിനു സംസ്ഥാന സർക്കാർ നിരോധനം ഏർപ്പെടുത്തി. നിരോധനം മാറ്റിയശേഷം സമരം തുടർന്നതിനാൽ പണി തടസപ്പെട്ടു. ഇതുമൂലം കരാർ പൂർത്തീകരിക്കേണ്ട തീയതി 2015 മാർച്ച് 14 ലേക്കു നീട്ടിത്തന്നു. പദ്ധതി പൂർത്തിയാക്കാൻ കഴിയാതെ തിരിച്ചടവു തുടങ്ങാനാകാത്തതിനാൽ വായ്പ നൽകിയ ബാങ്ക്് വായ്പയിൽനിന്നു പിന്മാറി.
സാന്പത്തിക പ്രതിസന്ധി മൂലം പണി തുടരാനായില്ല. വീണ്ടും നീട്ടിക്കിട്ടിയ 2017 മാർച്ചിനകം പണി പൂർത്തിയാക്കാൻ ശ്രമിച്ചെങ്കിലും ടണൽ നിർമാണവുമായി ബന്ധപ്പെട്ട് നാട്ടുകാർ സമരം ചെയ്തതോടെ വീണ്ടും എല്ലാം തടസപ്പെട്ടു. ഹൈക്കോടതി പോലീസ് സംരക്ഷണം അനുവദിച്ചെങ്കിലും ലഭിച്ചില്ലെന്നു കരാറുകാർ പറയുന്നു.
കിട്ടാക്കടമായതോടെ ബാങ്കുകൾ വായ്പ തരുന്നില്ല. ഈ സാഹചര്യത്തിൽ കന്പനി സ്വന്തം നിലയിൽ പണം കണ്ടെത്തി റോഡുപണി പൂർത്തീകരിക്കാൻ ശ്രമിക്കുകയാണെന്നും 82 ശതമാനം പണികളും പൂർത്തിയായെന്നും സത്യവാങ്മൂലത്തിൽ പറഞ്ഞു. 28.35 കിലോമീറ്റർ ദൂരമുളള റോഡിന്റെ 22 കിലോമീറ്റർ ദൂരം പൂർത്തീകരിച്ചെന്നും ബോധിപ്പിച്ചു.
ടണലിന്‍റെ ഗമന ബഹിർഗമന ഭാഗങ്ങളിലും വാണിയംപാറ ഭാഗത്തുമായി 1.43 ഹെക്ടർ വനഭൂമി ലഭിക്കാൻ അപേക്ഷ നൽകിയെങ്കിലും സർക്കാർ അനുമതി തന്നിട്ടില്ലെന്നും സത്യവാങ്മൂലത്തിൽ പറഞ്ഞിട്ടുണ്ട്.
എന്നാൽ. 2014 ൽ ദേശീയപാത അഥോറിറ്റി ജനറൽ മാനേജർ കരാർ കന്പനിക്കു കൊടുത്ത ടെർമിനേഷൻ നോട്ടീസിൽ 2012 ഫെബ്രുവരി 25 നകം കരാർ കന്പനിക്ക് 60 ശതമാനം ഭൂമി കൊടുക്കേണ്ടതിനു പകരം 88 ശതമാനം ഭൂമി കൈമാറിയെന്നു പറഞ്ഞിരുന്നു. ഒരു വർഷം കഴിഞ്ഞിട്ടും ആദ്യത്തെ കരാർ കാലാവധിയായ 2013 നു പണി ആരംഭിക്കാൻപോലും സാധിച്ചില്ലെന്നാണ് ടെർമിനേഷൻ നോട്ടീസിൽ പറഞ്ഞിരുന്നത്.
