രണ്ടായിരം കാലഘട്ടത്തിൽ മലയാളസിനിമയിൽ തിളങ്ങിനിന്ന താരമായിരുന്നു മന്യ. വികൃതിക്കാരിയായ പെണ്‍കുട്ടിയെ അവതരിപ്പിക്കാൻ മലയാള സംവിധായകരുടെ മനസിൽ ആദ്യമെത്തുന്ന മുഖം നടി മന്യയുടേതായിരുന്നു. വിവാഹ ശേഷം മറ്റു നായികമാരെപ്പോലെ മന്യയും ഈ രംഗം വിട്ടു. എന്നാൽ മന്യയുടെ ഒരു ഫോട്ടോ ഫേസ്ബുക്കിൽ വൈറലാകുകയാണ്.
ദിലീപിന്‍റെ നായികയായി മലയാളത്തിലെത്തിയ മന്യ, മഞ്ജു വാര്യർക്കൊപ്പം നിൽക്കുന്ന ഫോട്ടോ ആണ് ഇപ്പോൾ സോഷ്യൽ മീഡിയയിൽ വൈറലാകുന്നത്. നോർത്ത് അമേരിക്കൻ ഫിലിം അവാർഡ് സ്വീകരിക്കാൻ മഞ്ജു എത്തിയപ്പോഴാണ് ഈ ഫോട്ടോ എടുത്തത്. മന്യ ഇപ്പോൾ കുടുംബത്തിനൊപ്പം അമേരിക്കയിൽ സെറ്റിൽഡാണ്. അമേരിക്കയിൽ നടന്ന അവാർഡ്ദാന ചടങ്ങിൽ മഞ്ജു വാര്യർക്കൊപ്പം ഗീതു മോഹൻദാസും പങ്കെടുത്തിരുന്നു. ഗീതുവിനും മഞ്ജുവിനുമൊപ്പമാണ് മന്യയുടെ ഫോട്ടോ.
മാസങ്ങൾക്ക് മുൻപ് ദിലീപ് ഷോ 2017 ന്‍റെ ഭാഗമായി കാവ്യ മാധവനും ദിലീപും വന്നപ്പോഴും മന്യ ഉണ്ടായിരുന്നു. താരദന്പതികളെ സ്വീകരിച്ച മന്യ അവർക്കൊപ്പം നിന്നും ഫോട്ടോ പകർത്തിയിരുന്നു. ലോഹിതദാസ് സംവിധാനം ചെയ്ത ജോക്കർ(2000) എന്ന ചിത്രത്തിലൂടെ ദിലീപിന്‍റെ നായികയായാണ് മന്യ മലയാള സിനിമയിൽ എത്തിയത്. തുടർന്ന് കുഞ്ഞിക്കൂനൻ എന്ന ചിത്രത്തിലും മന്യ ദിലീപിനൊപ്പം അഭിനയിച്ചു. പിന്നീടു വണ്‍ മാൻ ഷോ, രാക്ഷസ രാജാവ്, വക്കാലത്ത് നാരായണൻ കുട്ടി, സ്വപ്നക്കൂട്, സ്വന്തം മാളവിക, ഉടയോൻ, അപരിചിതൻ, രക്ഷകൻ, പറഞ്ഞു തീരാത്ത വിശേഷങ്ങൾ, പതിനൊന്നിൽ വ്യാഴം തുടങ്ങിയ മലയാള സിനിമകളിലെ മന്യയുടെ വേഷങ്ങളും ശ്രദ്ധേയമായിരുന്നു.
മലയാളത്തിൽ മാത്രമല്ല, തമിഴിലും തെലുങ്കിലും കന്നടയിലും മന്യ അഭിനയിക്കുകയും വിജയം കാണുകയും ചെയ്തിട്ടുണ്ട്. നാലേ നാല് തമിഴ് ചിത്രങ്ങളേ ചെയ്തുള്ളൂവെങ്കിലും നാലും ശ്രദ്ധിക്കപ്പെട്ടവയാണ്. സിനിമയിൽ അവസരങ്ങൾ കുറഞ്ഞപ്പോൾ സീരിയലിലും സാന്നിധ്യം അറിയിച്ചു. വിവാഹത്തോടെ മറ്റ് നായികമാരെപ്പോലെ മന്യയും കളംവിട്ടു. 2008 മേയ് 31 നാണ് മന്യയുടെയും സത്യ പട്ടേലിന്‍റെയും വിവാഹം നടന്നത്.
