വൈപ്പിൻ: ഓച്ചന്തുരുത്ത് സർവീസ് സഹകരണ ബാങ്ക് തെരഞ്ഞെടുപ്പിനിടെ കോണ്ഗ്രസ്-ഐ ബ്ലോക്ക് സെക്രട്ടറിയും ഐഎൻടിയുസി ജില്ലാ കമ്മിറ്റിയംഗവുമായ കെ.എച്ച്. അബ്ബാസിനെ ഒരു പറ്റം സിപിഎം പ്രവർത്തകർ മർദ്ദിച്ചതായി ആരോപിച്ച് കോണ്ഗ്രസ്-ഐ മണ്ഡലം കമ്മിറ്റിയുടെ ആഭിമുഖ്യത്തിൽ പുതുവൈപ്പിൽ പ്രതിഷേധ പ്രകടനം നടത്തി. പരിക്കേറ്റ അബ്ബാസിനെ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.
ഷോൾഡറിനും തലക്കുമാണ് പരിക്കേറ്റിരിക്കുന്നത്. പോളിംഗ് നടന്ന സ്കൂളിനു മുന്നിലും പിന്നാലെ എത്തി തെക്കൻമാലിപ്പുറത്തും വച്ചാണ് മർദ്ദിച്ചതെന്നാണ് കോണ്ഗ്രസിന്റെ ആരോപണം. സിപിഎം പുറത്തുനിന്നു കൊണ്ടുവന്ന ഗുണ്ടകളാണെന്നും കോണ്ഗ്രസ് ആരോപിക്കുന്നു.
പ്രതികൾക്കെതിരേ കർശന നടപടികൾ സ്വീകരിച്ചില്ലെങ്കിൽ പ്രക്ഷോഭം കടുപ്പിക്കുമെന്ന് മണ്ഡലം നേതൃത്വം മുന്നറിയിപ്പ് നൽകി. പ്രകടനം മണ്ഡലം പ്രസിഡന്‍റ് കെ.വൈ. സിനോജ്കുമാർ ഉദ്ഘാടനം ചെയ്തു. നേതാക്കളായ കെ.എച്ച്. നൗഷാദ്, എ.എസ്. ബെന്നി, സ്വാതിഷ് സത്യൻ എന്നിവർ നേതൃത്വം നൽകി.
