പുതുക്കാട്: കെ.എസ്.ആർ.ടി.സി. സ്റ്റാന്‍റിൽ അധിക്രമിച്ച് കയറി ജീവനക്കാരെ ആക്രമിച്ച സംഭവത്തിൽ മൂന്നുപേർ അറസ്റ്റിൽ. വരാക്കര ചുക്കിരിക്കുന്ന് സ്വദേശി കിഴക്കുമുറി സുജിത്ത് (22), വട്ടണാത്ര സ്വദേശി മുല്ലക്കപ്പറന്പിൽ സോജിൻ (18), മണ്ണംപേട്ട തെക്കേക്കര സ്വദേശി ഐനിക്കൽ നെന്മണിക്കര വീട്ടിൽ റിജോ (20) എന്നിവരെയാണ് പുതുക്കാട് പോലീസ് പിടികൂടിയത്. കഴിഞ്ഞ 12-നായിരുന്നു കേസിനാസ്പദമായ സംഭവം.
ഡിപ്പോയിലെ സുരക്ഷാ ജീവനക്കാരൻ സഹദേവൻ(55), സൂപ്പർവൈസർ എം.എ. ഷാജി (55) എന്നിവരെയാണ് സംഘം ആക്രമിച്ചത്. മദ്യപിച്ചെത്തിയ സംഘത്തിലെ ഒരാൾക്ക് ബസിൽ കയറുന്നതിന് ബൈക്ക് സ്റ്റാന്‍റിനകത്തേക്ക് കയറ്റിയതാണ് പ്രശ്നത്തിന് കാരണം. ഇത് ചോദ്യംചെയ്ത സഹദേവനെ സംഘം കൈയേറ്റം ചെയ്തു.
അക്രമികളെ തടയാൻ ശ്രമിച്ച സൂപ്പർവൈസറെയും സംഘം ആക്രമിച്ചു. ഹെൽമെറ്റുകൊണ്ടുള്ള അടിയേറ്റ് ഷാജിയുടെ മുഖത്തും മൂക്കിനും പരിക്കേറ്റിരുന്നു. പുതുക്കാട് എസ്ഐ കെ.എൻ. സുരേഷ്, ജി.എസ്.സി.പി.ഒ. സഫീർ എന്നിവരുടെ നേതൃത്വത്തിലായിരുന്നു അറസ്റ്റ്.
