ചവറ: കൃത്യനിര്‍വഹണത്തിനിടെ പോലീസിനെ ആക്രമിച്ച് പരിക്കേല്‍പ്പിച്ച കേസിലുള്‍പ്പെട്ട രണ്ട് യുവാക്കളെ ചവറ പോലീസ് പിടി കൂടി. പന്മന സ്വദേശികളായ വടുതല പാവൂര്‍ പടിഞ്ഞാറ്റതില്‍ വിനോദ് (31), ചോല ഷൈജു ഭവനത്തില്‍ വിഷ്ണു (29) എന്നിവരെയാണ് പിടികൂടിയത്.
പോലീസ് പറയുന്നത്: കഴിഞ്ഞ 21ന് പുലര്‍ച്ചെ 3.30 ഓടെ പോലീസ് കണ്ട്രോള് റൂം സംഘത്തിന് വടുതലക്ക് തെക്ക് വശം മദ്യപിച്ച് ബഹളം വക്കുന്നു എന്ന് ഫോണ്‍ വന്നതിനെ തുടര്‍ന്ന് പോലീസ് അന്വേഷിക്കാനെത്തിയപ്പോഴായിരുന്നു സംഭവം.
മദ്യ ലഹരിയിലായിരുന്ന യുവാക്കളെ പറഞ്ഞ് വിടാന്‍ ശ്രമിക്കുന്നതിനിടയില്‍ പോലീസിന് നേരെ അസഭ്യ വര്‍ഷം ചൊരിഞ്ഞ് ആക്രമിച്ച് രണ്ട് പോലീസുകാര്‍ക്ക് പരിക്കേല്‍ക്കുകയും ചെയ്തു. സംഭവം അറിഞ്ഞ് കൂടുതല്‍ പോലീസെത്തിയപ്പോഴെക്കും യുവാക്കളുടെ സംഘം ഓടി രക്ഷപെട്ടു.
തുടര്‍ന്ന് ഇവര്‍ക്കായി സിഐ എ. നിസാമുദീൻ, എസ് ഐ ഷെഫീക്ക് എന്നിവരുടെ നേതൃത്വത്തിൽ പോലീസ് സംഘം അന്വേഷണം നടത്തി വരുന്നതിനിടയില്‍ വിനോദിനെയും വിഷ്ണുവിനെയും പോലീസ് അറസ്റ്റ് ചെയ്യുകയായിരുന്നു.
സംഘത്തലുള്‍പ്പെട്ട രണ്ട് പേര്‍ക്കായി അന്വേഷണം നടത്തി വരുന്നതായി പോലീസ് അറിയിച്ചു. രണ്ട് പേരെയും കോടതിയില്‍ ഹാജരാക്കി റിമാന്‍റ് ചെയ്തു.
