ഉലാൻബത്തോർ: സ്നേഹത്തിനായുള്ള അന്വേഷണത്തിന്‍റെ ഉത്തരമാണ് ക്രൈസ്തവ വിശ്വാസമെന്ന് ഫ്രാൻസിസ് മാർപാപ്പ. മംഗോളിയൻ തലസ്ഥാനമായ ഉലാൻബത്തോറിലെ സ്റ്റെപ്പി അരീന സ്റ്റേഡിയത്തിൽ വിശുദ്ധ കുർബാന അർപ്പിച്ചു സന്ദേശം നല്കുകയായിരുന്നു അദ്ദേഹം.
വിശാലമായ പുൽപ്രദേശങ്ങളാലും മരുഭൂമിയാലും വരണ്ടതെങ്കിലും സന്പന്നമായ ചരിത്രവും സംസ്കാരവും പേറുന്ന മംഗോളിയ, മനുഷ്യരിലെ സ്നേഹത്തിനും സന്തോഷത്തിനുമായുള്ള ദാഹത്തിന്‍റെ പ്രതിരൂപമാണ്.
മംഗോളിയയുടെ നാടോടി പാരന്പര്യം അനുസ്മരിച്ച മാർപാപ്പ, നമ്മളെല്ലാം സന്തോഷവും സ്നേഹവും അന്വേഷിക്കുന്ന, ദൈവത്തിന്‍റെ നാടോടികളും തീർഥാടകരുമാണെന്നു പറഞ്ഞു. ഈ അന്വേഷണത്തിനുള്ള ഉത്തരമാണ് ക്രൈസ്തവ വിശ്വാസമെന്ന് അദ്ദേഹം കൂട്ടിച്ചേർത്തു.
ചൈനയിലെ ക്രൈസ്തവർ നല്ല പൗരന്മാരാകുക
കുർബാനയുടെ അന്ത്യത്തിൽ മാർപാപ്പ ചൈനീസ് കത്തോലിക്കാ വിശ്വാസികളോട്, നല്ല ക്രിസ്ത്യാനികളും നല്ല ക്രൈസ്തവരുമായിരിക്കാൻ ആഹ്വാനം ചെയ്തു.
ഹോങ്കോംഗിലെ ബിഷപ് എമരിറ്റസ് കർദിനാൾ ജോൺ തോംഗ് ഹോൺ, ഇപ്പോഴത്തെ ബിഷപ് സ്റ്റീഫൻ ചൗ എന്നിവരെ വേദിയിലേക്കു വിളിച്ച് ഇരുവരുടെയും കൈകളിൽ പിടിച്ചുകൊണ്ടാണ് മാർപാപ്പ ഇതു പറഞ്ഞത്. ചൈനീസ് ജനതയ്ക്ക് മാർപാപ്പ അഭിവാദ്യവും ആശംസകളും നേർന്നു. ചൈനക്കാർ പരിശ്രമത്തിലൂടെ മുന്നേറണമെന്നും കൂട്ടിച്ചേർത്തു.
മംഗോളിയൻ സന്ദർശനത്തിന്‍റെ മൂന്നാം ദിനമായ ഇന്നലെ രാവിലെ മാർപാപ്പ ഹൺ തിയേറ്ററിൽ എക്യുമെനിക്കൽ, മതാന്തര സംവാദത്തിൽ പങ്കെടുത്തു.
ഫ്രാൻസിസ് മാർപാപ്പയുടെ 43-ാം അപ്പസ്തോലിക സന്ദർശനവും മംഗോളിയയിൽ ഒരു മാർപാപ്പ നടത്തുന്ന ആദ്യസന്ദർശനവുമാണിത്. 40,000ത്തിനടുത്തുമാത്രം ക്രൈസ്തവരുള്ള മംഗോളിയയിൽ 1450 കത്തോലിക്കരേയുള്ളൂ. ഇന്ന് ഹൗസ് ഓഫ് മേഴ്സി എന്ന ജീവകാരുണ്യ കേന്ദ്രം ഉദ്ഘാടനം ചെയ്തശേഷം മാർപാപ്പ റോമിലേക്കു മടങ്ങും.
