കൊച്ചി: വീട്ടുമുറ്റത്തെ കൂണ്‍ കഴിച്ച് അവശനിലയില്‍ ആശുപത്രിയില്‍ ചികിത്സയിലായിരുന്ന യുവാവ് മരിച്ചു. പനങ്ങാട് കിളിയന്തറ വീട്ടില്‍ ഷിയാസ് റഹ്മാൻ (45) ആണ് മരിച്ചത്.
കഴിഞ്ഞ ആറിന് പനങ്ങാടുള്ള സഹോദരന്‍റെ പറമ്പില്‍നിന്ന് കൂണ്‍ ശേഖരിച്ച് ഷിയാസ് ഭക്ഷണം ഉണ്ടാക്കി കഴിച്ചിരുന്നു. പെട്ടെന്നാണ് ഇദ്ദേഹത്തിന്‍റെ ആരോഗ്യനില മോശമായത്.
വയറിളക്കവും ഛര്‍ദിയും അനുഭവപ്പെട്ടതിനെത്തുടര്‍ന്ന് ഷിയാസ് സ്വകാര്യ ആശുപത്രിയില്‍ ചികിത്സയിലായിരുന്നു. ഇന്നലെ രാത്രി ഹൃദയാഘാതം ഉണ്ടായതാണ് മരണകാരണം.
മുമ്പും ഷിയാസ് കൂണ്‍ ഭക്ഷിച്ചിട്ടുണ്ടെന്ന് ഭാര്യ പോലീസിന് മൊഴി നല്‍കിയിട്ടുണ്ട്. പനങ്ങാട് പോലീസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹം പോസ്റ്റുമോര്‍ട്ടത്തിനായി മാറ്റി.
