പാലക്കാട്: ഷൊർണൂർ മാന്പറ്റയിൽ കയിലിയാട് സ്വദേശിയായ എം.ബി.രാജേഷ് സാന്പത്തികശാസ്ത്രത്തിൽ ബിരുദാനന്തര ബിരുദവും എൽഎൽബിയും നേടിയിട്ടുണ്ട്. നാമനിർദേശപത്രിക സമർപ്പിക്കുന്ന സമയത്തു എം.ബി.രാജേഷിന്‍റെ കൈയിൽ 5,000 രൂപയും ഭാര്യയുടെ കൈയിൽ 5,000 രൂപയും അമ്മയുടെ കൈവശം 3,000 രൂപയും അച്ഛന്‍റെ കൈവശം 2,000 രൂപയും ഉള്ളതായി രേഖപ്പെടുത്തിയിട്ടുണ്ട്.
എം.ബി.രാജേഷിന് 12 ലക്ഷം മതിപ്പുവിലയുള്ള 2015 മോഡൽ റനോൾട്ട് ഡസ്റ്റർ എസ്യുവി കാറും, ഭാര്യയ്ക്ക് 15,000 രൂപയും 20,000 രൂപയും മതിപ്പുവിലയുള്ള രണ്ടു ഇരുചക്ര വാഹനങ്ങളുമുണ്ട്. എം.ബി. രാജേഷിന്‍റെ പേരിൽ വിവിധ ബാങ്കുകളിലായി 30,79,234 രൂപയുടെ നിക്ഷേപമുണ്ട്.
ഇതിൽ 2,625 രൂപയുടെ സ്റ്റേറ്റ് ബാങ്കിലെ നിക്ഷേപം ഭാര്യയുമായുള്ള ജോയിന്റ് അക്കൗണ്ടാണ്. എൽഐസി, എസ്ബിഐ ലൈഫ് യൂണിറ്റ് ലിങ്ക്ഡ്, പോസ്റ്റ് ഓഫീസ് ലൈഫ് ഇൻഷ്വറൻസ് എന്നിവയിലായി 8,11,385 രൂപയുടെ പോളിസിയും എം.ബി. രാജേഷിനുണ്ട്. ഇതിനുപുറമെ കാർ ലോണ് ഇനത്തിൽ 2,37,706 രൂപയുടെയും ഭാര്യയുമായുള്ള ജോയിന്റ് അക്കൗണ്ടിൽ 56,715 രൂപയുടെ ഭവനവായ്പയും അടക്കം 2,94,421 രൂപയുടെ ബാധ്യതയും ഉണ്ട്.
ഭാര്യയുടെ പേരിൽ മൂന്നുലക്ഷം വിലയുള്ള 120 ഗ്രാം സ്വർണം, മലയാളം കമ്യൂണിക്കേഷൻസിൽ 100 രൂപയുടെ ഓഹരി, 15 സെന്‍റ് സ്ഥലം, 20 ലക്ഷം രൂപ മതിപ്പുവിലയുള്ള 1950 സ്ക്വയർഫീറ്റ് വീട് എന്നിവയുണ്ട്. വിവിധ ബാങ്കുകളിലായി 2,95,153.43 രൂപയുടെ നിക്ഷേപമുണ്ട്. ഇതിനുപുറമെ 8,26,511 രൂപയുടെ വിവിധ ഇൻഷ്വറൻസ് പോളിസികളുമുണ്ട്. സ്റ്റേറ്റ് ബാങ്ക് ഓഫ് ഇന്ത്യയിൽ എം.ബി. രാജേഷുമായുള്ള ജോയിന്റ് അക്കൗണ്ടിൽ 56,715 രൂപയുടെ ഭവനവായ്പയുമുണ്ട്.
മക്കളുടെ പേരിൽ 40 ഗ്രാം സ്വർണവും 200 ഗ്രാം സ്വർണവുമുണ്ട്. അച്ഛന്‍റെ പേരിൽ 0.33 ഹെക്ടർ ഭൂമിയും വിവിധ ബാങ്കുകളിലായി 8,97,930 രൂപയുടെ നിക്ഷേപമുണ്ട്. ഇതിനു പുറമേ ബാങ്കിൽ മൂന്നുലക്ഷം രൂപയുടെ കാർഷിക വായ്പയുമുണ്ട്. അമ്മയുടെ പേരിൽ 0.12 ഹെക്ടർ ഭൂമിയുമുണ്ട്. കൂടാതെ ചളവറയിൽതന്നെ 0.28 ഹെക്ടർ പുരയിടത്തിൽ 1750 സ്ക്വയർഫീറ്റ് വീടും വിവിധ ബാങ്കുകളിലായി 14,02,001 രൂപയുടെ നിക്ഷേപവുമുണ്ട്.
