കോട്ടയം: പാഷാണം ഷാജി നയിച്ച മിമിക്സ് ഇലവനെ 56 റണ്‍സിനു കീഴടക്കി മീഡിയ സ്ട്രൈക്കേഴ്സ് കേരള എംസിഎ ജവിൻസ് കപ്പ് സ്വന്തമാക്കി. മാന്നാനം സെന്‍റ് എഫ്രോംസ് സ്കൂൾ മൈതാനത്തു നടന്ന ഫൈനലിൽ ആദ്യം ബാറ്റ് ചെയ്ത മീഡിയ സ്ട്രൈക്കേഴ്സ് 20 ഓവറിൽ എട്ടു വിക്കറ്റിന് 176 റണ്‍സെടുത്തു.
മിമിക്സ് ഇലവന്‍റെ മറുപടി ഇന്നിംഗ്സ് 120 റണ്‍സിൽ അവസാനിച്ചു. 75 റണ്‍സെടുത്ത അജയ് ദേവും നാലു വിക്കറ്റ് വീഴ്ത്തിയ മഹേഷ് പോലൂരുമാണു മീഡിയ സ്ട്രൈക്കേഴ്സിന്‍റെ വിജയ ശില്പികൾ.റോയൽ എൻഫീൽഡിന്‍റെ കോട്ടയത്തെ അംഗീകൃത ഡീലർമാരായ ജവിൻസ് മോട്ടോഴ്സ് സ്പോണ്സർ ചെയ്ത ടൂർണമെന്‍റിൽ സിനിമ, സീരിയൽ, ഗായകരംഗത്തെ ടീമുകൾ പങ്കെടുത്തു.
സമ്മേളനത്തിൽ മാന്നാനം സെന്‍റ് ജോസഫ് ആശ്രമം പ്രിയോർ ഫാ. സെബാസ്റ്റ്യൻ ചാമത്തറ സിഎംഐ, കേരള ക്രിക്കറ്റ് അസോസിയേഷൻ വൈസ് പ്രസിഡന്‍റ് റോക്ലിൻ ജോണ്, മാന്നാനം സ്പോർട്സ് അക്കാഡമി ഡയറക്ടർ ഫാ. ആന്‍റണി കാഞ്ഞിരത്തിങ്കൽ എന്നിവർ സമ്മാനങ്ങൾ വിതരണംചെയ്തു. ജവിൻസ് മോട്ടോഴ്സ് പ്രതിനിധി ടോം, കെസിഎ അക്കാഡമി പരിശീലകൻ ജിതിൻ ഫ്രാൻസിസ്, ഗായകൻ മഹേഷ് ബാബു എന്നിവർ സന്നിഹിതരായിരുന്നു.
