മീനയെ സംബന്ധിച്ചടത്തോളം 2021 നേട്ടങ്ങളുടെ വര്‍ഷഷമാവുകയാണ്. സൂപ്പര്‍ഹിറ്റായ ഒരു ചിത്രത്തിന്‍റെ റീമേക്കിലും നായികയാകാന്‍ അവസരം ലഭിക്കുക.
അതും ചിത്രം പുറത്തിറങ്ങി ഒരു മാസം പിന്നിടുമ്പോള്‍ തന്നെ.
ദൃശ്യം 2 തെലുങ്ക് പതിപ്പിലാണ് മീന നായികയാവുന്നത്. വെങ്കടേഷ് ദഗുബാട്ടിയാണ് ഈ ചിത്രത്തിലെ നായകന്‍. ജീത്തു ജോസഫ് സംവിധാനം ചെയ്യുന്ന ചിത്രം ആന്‍റണി പെരുമ്പാവൂര്‍ നിര്‍മിക്കുന്നു.
നദിയ മൊയ്തു, എസ്തര്‍ അനില്‍, കൃതിക ജയകുമാര്‍, നരേഷ്, കാശി വിശ്വനാഥ് എന്നിവര്‍ പ്രധാനകഥാപാത്രങ്ങളെ അവതരിപ്പിക്കുന്നു.
സതീഷ് കുറുപ്പ് ആണ് ഛായാഗ്രഹണം. മലയാളി പ്രേക്ഷകരുടെ പ്രിയങ്കരിയായി മീന മാറിയത് ദൃശ്യം എന്ന സിനിമയിലെ റാണി എന്ന കഥാപാത്രലൂടെയാണ്.
ജോര്‍ജ്കുട്ടിയുടെ നാട്ടിന്‍പുറത്തുകാരിയായ ഭാര്യയായി, അഞ്ചുവിന്‍റെയും അനുമോളുടെയും അമ്മയായി പ്രേക്ഷകര്‍ മീനയെ എക്കാലത്തേക്കാളും സ്‌നേഹത്തോടെ നെഞ്ചിലേറ്റി.
ഇപ്പോള്‍ ഈ സിനിമയുടെ ഭാഗമാവാന്‍ ഒരിക്കല്‍ക്കൂടി കഴിഞ്ഞതിന്‍റെ സന്തോഷത്തിലാണ് മീന. തെലുങ്കിലെത്തുമ്പോള്‍ ജ്യോതി എന്നാണ് കഥാപാത്രത്തിന്‍റെ പേര്.
ജോര്‍ജ്കുട്ടി തെലുങ്കില്‍ രാംബാബു ആകും. അനുവും അഞ്ജുവും അതുപോലെ തന്നെ പേരുകളില്‍ മാറ്റമില്ലാതെ തുടരുന്നു. തൊടുപുഴ തന്നെയാകും തെലുങ്ക് പതിപ്പിന്‍റെയും പ്രധാന ലൊക്കേഷന്‍.
ചിത്രത്തിന്‍റെ ഇന്‍ഡോര്‍ ചിത്രീകരണങ്ങള്‍ ഏതാനും ദിവസം മുന്‍പ് ഹൈദരാബാദിൽ ആരംഭിച്ചിരുന്നു.
തെലുങ്ക് സിനിമയ്ക്കു പിന്നാലെ തമിഴ്, കന്നഡ ചിത്രങ്ങളും തൊടുപുഴ തന്നെ ചിത്രീകരിക്കാന്‍ അണിയറ പ്രവര്‍ത്തകര്‍ പദ്ധതിയിടുന്നുണ്ട്.
