ന്യൂഡൽഹി: ഈ വർഷം ജൂലൈ 23 മുതൽ ഓഗസ്റ്റ് എട്ട് വരെ നടക്കുന്ന ടോക്കിയോ ഒളിന്പിക്സ് ആയിരിക്കും തന്‍റെ അവസാന ഒളിന്പിക്സ് എന്ന് ഇന്ത്യൻ ബോക്സിംഗ് വനിതാ ഇതിഹാസം മേരി കോം. പ്രായം 38 കഴിഞ്ഞു. 2024 പാരീസ് ഒളിന്പിക്സിലും മത്സരിക്കണമെന്ന് ആഗ്രഹിച്ചാലും പ്രായം ഒരു പ്രധാന പ്രശ്നമാണ്- മേരി കോം പറഞ്ഞു.
ആറു തവണ ലോക ചാന്പ്യൻഷിപ്പ് ജേതാവായ മേരി കോമിന്റെ ഏക ഒളിന്പിക് മെഡൽ 2012ൽ ലണ്ടനിൽവച്ചായിരുന്നു. ലണ്ടൻ ഒളിന്പിക്സിൽ ഫ്ളൈവെയ്റ്റിൽ മേരി കോം വെങ്കലം സ്വന്തമാക്കി.
