ബാഴ്സലോണ: ലയണൽ മെസിയുടെ മിന്നും പ്രകടനത്തിന്‍റെ ചിറകിലേറിയ ബാഴ്സലോണയ്ക്ക് ലാ ലീഗയിൽ തിളക്കമാർന്ന ജയം. മെസിയും കൂട്ടരും 4-1ന് റയൽ ബെറ്റിസിനെ തകർത്തു. ഹാട്രിക്കുമായി മെസി ജയത്തിന്‍റെ ചുക്കാൻ പിടിച്ചു. ലൂയിസ് സുവാരസ് ഒരു ഗോൾ നേടി. ലോറെൻ മോറോൻ ബെറ്റിസിന്‍റെ ആശ്വാസ ഗോൾ നേടി.
18-ാം മിനിറ്റിൽ ഒരു ഫ്രീ കിക്കിലൂടെയാണ് മെസി ഗോൾവേട്ട തുടങ്ങിയത്. ആദ്യ പകുതിയുടെ അവസാന മിനിറ്റിൽ മെസി രണ്ടാം ഗോളുമടിച്ചു. രണ്ടാം പകുതിയിൽ ആക്രമിച്ച് കളിച്ച് തുടങ്ങിയ ബാഴ്സ സുവാരസിലൂടെ ലീഡ് ഉയർത്തി.
82-ാം മോറോനിലൂടെ ബെറ്റിസ്‌ ഒരു ഗോൾ തിരിച്ചടിച്ചു. മൂന്നു മിനിറ്റുകൾക്കുള്ളിൽ വണ്ടർ ഗോളിൽ മെസി ഹാട്രിക്ക് പൂർത്തിയാക്കി. ബോക്സിന്‍റെ എഡ്ജിൽ നിന്നും മെസി തൊടുത്ത പന്ത് വലയിൽ എത്തി.
ജയത്തോടെ രണ്ടാംസ്ഥാനക്കാരുമായുള്ള ലീഡ് വ്യത്യാസം പത്തായി ഉയർത്താൻ ബാഴ്സലോണയ്ക്ക് സാധിച്ചു. നിലയിൽ 28 മത്സരങ്ങളിൽ 66 പോയിന്‍റുമായി ഒന്നാം സ്ഥാനത്ത് തുടരുകയാണ് ബാഴ്സ.
