ചങ്ങനാശേരി: വരാപ്പുഴ പപ്പന്‍ മെമ്മോറിയല്‍ ഇന്‍ഡോര്‍ സ്റ്റേഡിയത്തില്‍ നടന്ന എംജി യൂണിവേഴ്‌സിറ്റി ഇന്‍റര്‍ കൊളീജിയേറ്റ് വോളിബോള്‍ ചാമ്പ്യന്‍ഷിപ്പില്‍ ചങ്ങനാശേരി അസംപ്ഷന്‍ കോളജ് ജേതാക്കളായി.
വോളിബോള്‍ ലീഗ് പോരാട്ടത്തില്‍ എതിരാളികള്‍ക്ക് ഒരു സെറ്റുപോലും വിട്ടുകൊടുക്കാതെ തുടര്‍ച്ചയായി മൂന്നു മത്സരങ്ങളിലും ആധികാരിക വിജയം നേടിയാണ് അസംപ്ഷന്‍ വിജയികളായത്.
അസംപ്ഷന്‍ കോളജിലെ നിയ അനില്‍ ടൂര്‍ണമെന്‍റിലെ മികച്ച കളിക്കാരിയായി തെരഞ്ഞെടുക്കപ്പെട്ടു. സ്‌പോര്‍ട്‌സ് കൗണ്‍സില്‍ വോളിബോള്‍ പരിശീലകനായ നവാസ് വഹാബാണ് ടീമിന്‍റെ മുഖ്യപരിശീലകന്‍. കാതോലിക്കേറ്റ് കോളജ് പത്തനംതിട്ട രണ്ടാം സ്ഥാനവും അല്‍ഫോന്‍സാ കോളജ് പാലാ മൂന്നാം സ്ഥാനവും നേടി.
