വന്‍ നഗരങ്ങളില്‍ ഒരു വീടു വാങ്ങുന്നത് പലരുടെയും സ്വപ്‌നമാണ്. എന്നാല്‍ വര്‍ധിച്ച ചെലവ് ആ സ്വപ്‌നത്തിനു തടയിടുകയാണ് പതിവ്. എന്നാല്‍ അത്തരക്കാരുടെ സ്വപ്‌നം പൂവണിയാനുള്ള മാര്‍ഗമാണ് ഒപോഡ് ട്യൂബ് ഹൗസിങ്ങ് സിസ്റ്റം അഥവാ കോണ്‍ക്രീറ്റ് പൈപ്പ് ട്യൂബുകള്‍. ഹോങ്കോങ്ങ് ആസ്ഥാനമായി പ്രവര്‍ത്തിക്കുന്ന സൈബര്‍ടെക്‌സ്ച്ചറിലെ ആര്‍ക്കിടെക്ട് ജെയിംസ് ലോയുടെ സംഭാവനയാണ് ഈ ആശയം.
രാത്രി കാലങ്ങളില്‍ ബെഡ് ആക്കി മാറ്റാവുന്ന ഒരു ബെഞ്ചാണ് എട്ടടി വ്യാസമുള്ള ഈ പൈപ്പുകളില്‍ ഉള്‍ക്കൊള്ളുന്നത്. നഗരങ്ങളിലെ സ്ഥലക്കുറവും മിതമായ നിരക്കിലുള്ള പാര്‍പ്പിട സൗകര്യവുമാണ് ഈ നൂതന സംവിധാനം ലക്ഷ്യമിടുന്നത്. ഒന്നോ രണ്ടോ പേര്‍ക്ക് താമസിക്കാവുന്ന ഇത്തരം മൈക്രോഹോമുകളില്‍ ലിവിങ് കം ബെഡ്‌റൂം, മിനി ഫ്രിഡ്ജ്, ബാത്‌റൂം, ഷവര്‍, സ്റ്റോറേജ് സ്‌പേയ്‌സ് എന്നിവ സജ്ജീകരിച്ചിരിക്കുന്നു. എട്ടടി വ്യാസമുള്ള കോണ്‍ക്രീറ്റ് പൈപ്പുകള്‍ പുനര്‍നിര്‍മ്മിച്ച് 100 ചതുരശ്ര അടി വിസ്തീര്‍ണ്ണമുള്ള മൈക്രോ ഹോമുകളിലേക്ക് രൂപമാറ്റം വരുത്തിയാണ് ഓരോ ഭവനവും നിര്‍മ്മിക്കുന്നത്.
നമുക്ക് താങ്ങാനാവുന്ന വിലയില്‍ നല്ല സ്റ്റൈലിഷായി നിര്‍മിക്കാമെന്നതാണ് ഇതിന്റെ പ്രത്യേകത. രണ്ട് ഭാഗങ്ങളിലായാണ് ഇവ നിലകൊള്ളുന്നത്. രാത്രിയില്‍ കിടക്കയാക്കി മാറ്റാന്‍ സാധിക്കുന്ന സോഫയുള്ള ഒരു മുന്‍മുറിയാണ് ഒപോഡിന്റെ പ്രധാനഭാഗം. മറ്റൊന്നില്‍ ബാത്‌റൂമും സ്റ്റോറേജും ക്രമീകരിച്ചിരിക്കുന്നു.നഗര ഹൃദയങ്ങളില്‍ വീട് വയ്ക്കുവാന്‍ താത്പര്യമുള്ള യുവാക്കള്‍ക്കും മിതമായ നിരക്കില്‍ താമസ സൗകര്യങ്ങള്‍ എന്ന ഉദ്യോഗസ്ഥരുടെ ആവശ്യങ്ങളും കൈക്കൊള്ളുന്നതാണ് ഈ പാര്‍പ്പിട പദ്ധതി.
ചെറിയ കമ്മ്യൂണിറ്റികള്‍ സൃഷ്ടിക്കുന്നതിനായി ഒന്നിനു മുകളില്‍ ഒന്നൊന്നായി അടുക്കി വച്ചാണ് ഇവ നിര്‍മ്മിക്കുന്നത്. അങ്ങേയറ്റം തിരക്കേറിയ ഹോങ്കോങ്ങ് പോലുള്ള നഗരത്തിലെ ഭവന നിര്‍മ്മാണവും സ്ഥലത്തിന്റെ അഭാവവും പരിഹരിക്കാനുമെന്നാണ് ഓപോഡിന്റെ കണ്ടുപിടുത്തക്കാര്‍ അവകാശപ്പെടുന്നത്. എന്നാല്‍ ഇത് വിജയമാകുമോയെന്ന് അറിയാന്‍ ഇനിയും സമയമെടുക്കും.
