സമൂഹമാധ്യമങ്ങളില്‍ പ്രത്യേകിച്ച്, ഫേസ്ബുക്കില്‍ എന്തൊക്കെ എപ്പോഴൊക്കെ ഹിറ്റാകുമെന്നത് പറയാനാവില്ല. ചിലപ്പോള്‍ ഒരു വലിയ പോസ്റ്റായിരിക്കാം ചിലപ്പോള്‍ ഒരു ചിത്രമായിരിക്കാം മറ്റു ചിലപ്പോള്‍ ചെറിയൊരു കമന്റുപോലുമാവാം. അത്തരത്തിലൊന്നാണ് സംവിധായകന്‍ മിഥുന്‍ മാനുവല്‍ തോമസിന്റെ ഒരു പോസ്റ്റിന് സംഗീത സംവിധായകന്‍ ഷാന്‍ റഹ്മാന്‍ കൊടുത്ത മറുപടി. പോക്കറ്റില്‍ നിന്ന് തെറിച്ചു പോയ സ്വന്തം ഫോണിന് സംഭവിച്ച കാര്യമാണ് മിഥുന്‍ സമൂഹമാധ്യമത്തില്‍ പങ്കുവച്ചത്. ആ എഴുത്തിനു താഴെ ഷാന്‍ നല്‍കിയ മറുപടി ആളുകള്‍ക്ക് ഏറെ പ്രിയങ്കരമായി മാറി.
‘ബൈക്ക് ഓടിക്കുമ്പോള്‍ ഫോണ്‍ കീശയില്‍ നിന്നും തെറിച്ചു ഹൈവേയില്‍ വീണാല്‍, അതിന്റെ മുകളിലൂടെ പുറകേ വരുന്ന പാണ്ടിലോറിയും, കാറും പിന്നെ ഏതാണ്ടൊക്കെയോ വണ്ടികളും കേറി ഇറങ്ങുമെന്നും , ഫോണ്‍ ഏതാണ്ട് ഈ പരുവത്തില്‍ ആകും എന്നും ഇപ്പൊ മനസ്സിലായി…’എന്നാണ് മിഥുന്‍ കുറിച്ചത്. നന്നായി ഇനി നീ ബാക്ക്ഗ്രൗണ്ട് സ്‌കോര്‍ എന്തായി എന്നു ചോദിച്ച് വിളിക്കില്ലല്ലോ എന്നാണ് ഷാന്‍ അതിനുള്ള മറുപടിയായി കമന്റ് ബോക്‌സില്‍ കുറിച്ചത്. ഷാന്റെ കമന്റിന് ലഭിച്ചത് രണ്ടായിരത്തോളും ലൈക്കുകളാണ്. പ്രഭാകരാ… എന്നു വിളിച്ച് മിഥുന്‍ ഇതിനു മറുപടിയും നല്‍കി. സംവിധായകന്റെയും സംഗീത സംവിധായകന്റെയും കമന്റുകള്‍ അതോടെ ഞൊടിയിടയില്‍ വൈറലുമായി. മിഥുന്റെ ആട് 2 വിന് പശ്ചാത്തല സംഗീതം ഒരുക്കുന്നത് ഷാന്‍ ആണ്. ആടിന്റെ ഒന്നാംഭാഗത്തിന് ഷാന്‍ ഒരുക്കിയ സംഗീതം ഏറെ പ്രേക്ഷക പ്രീതി നേടിയിരുന്നു.
