കൊച്ചി: മുന്‍ മിസ് കേരളയടക്കം മൂന്നു പേര്‍ കാറപകടത്തില്‍ മരിച്ച സംഭവത്തില്‍ കേസില്‍ ഇടപ്പെട്ട രണ്ട് പോലീസ് ഉന്നതര്‍ക്കെതിരേ നടപടിക്കു സാധ്യത.
സംഭവ ശേഷം പോലീസ് അന്വേഷണം നടക്കുന്നതിനിടെ സംസ്ഥാന പോലീസ് സേനയിലെ ഉന്നതനും ജില്ലയിലെ ഒരു പോലീസ് ഉന്നതനും ഈ വിഷയത്തില്‍ കാര്യമായ ഇടപെടലുകള്‍ നടത്തുന്നതായി വാര്‍ത്തകള്‍ പുറത്തുവന്നിരുന്നു.
ഇതു സംബന്ധിച്ച സംസ്ഥാന ഇന്‍റലിജന്‍സ് റിപ്പോര്‍ട്ട് നല്‍കിയതായാണ് അറിയുന്നത്. ഈ ഐപിഎസ് ഉദ്യോഗസ്ഥരുടെ നിര്‍ദേശ പ്രകാരമാണ് ഹോട്ടലുടമയെ ചോദ്യം ചെയ്യാന്‍ വൈകിയതെന്നും ആക്ഷേപമുണ്ട്. ഇതില്‍ ഒരാള്‍ കൊച്ചിയില്‍ ക്യാമ്പ് ചെയ്തു സ്ഥിതിഗതികള്‍ വിലയിരുത്തിയിരുന്നതായും അറിയുന്നു.
അതേസമയം, സംസ്ഥാന പോലീസ് മേധാവിയും കൊച്ചി സിറ്റി പോലീസ് കമ്മീഷണറും ഈ കേസില്‍ ശക്തമായ നിലപാടാണ് എടുത്തിരിക്കുന്നത്. ആരോപണ വിധേയരായ ഐപിഎസുകാരെ ലോ ആന്‍ഡ് ഓര്‍ഡര്‍ ഡ്യൂട്ടികളില്‍നിന്നു നീക്കം ചെയ്യാനുള്ള നടപടി തുടങ്ങിയതായും അറിയുന്നു.
