പത്തനംതിട്ട: നഗരത്തില്‍ വെട്ടിപ്രം സുബല പാര്‍ക്കിനു സമീപമുള്ള ചതുപ്പില്‍ മരിച്ച നിലയില്‍ കണ്ടെത്തിയ കെ.കെ. മഹീന്ദ്രന്‍റെ (37) മരണം കൊലപാതകമെന്നു സംശയം. വീട്ടില്‍നിന്ന് മൂന്നു ദിവസം മുമ്പ് കാണാതായ മഹീന്ദ്രനെ ഇന്നലെയാണ് മരിച്ച നിലയില്‍ കണ്ടെത്തിയത്.
മൃതദേഹത്തിന് രണ്ടര ദിവസത്തെ പഴക്കം തോന്നിക്കും. ചതുപ്പില്‍ മുഖം കുത്തിയ നിലയിലായിരുന്നു മൃതദേഹം. കൈകള്‍ തിരിഞ്ഞ് ഇരിക്കുകയാണ്.കഴിഞ്ഞ 18ന് രാവിലെ സമീപത്തുള്ള റേഷന്‍ കട ഉടമ കിറ്റ് വാങ്ങുന്നതിനായി മഹീന്ദ്രനെ ഫോണില്‍ ബന്ധപ്പെട്ടിരുന്നു.
ഉച്ച കഴിഞ്ഞ് 2.30വരെ കട തുറന്നിരുന്നുവെങ്കിലും ഇയാള്‍ കിറ്റിനായി എത്തിയിരുന്നില്ലെന്ന് കട ഉടമ പറഞ്ഞു. റേഷന്‍ കടയിലേക്കെന്നു പറഞ്ഞാണ് മഹീന്ദ്രന്‍ വീട്ടില്‍ നിന്ന് ഇറങ്ങിയതെന്ന് സഹോദരിയും പറയുന്നു. മൃതദേഹം കാണപ്പെട്ട സ്ഥലവും മൃതദേഹം കിടന്നതിലെ അസ്വാഭാവികതയുമാണ് ദുരൂഹത വര്‍ധിപ്പിക്കുന്നത്.
ചതുപ്പില്‍ മുങ്ങി മരിക്കാനുള്ള സാധ്യത കുറവാണ്.ഉള്ളിലേക്ക് മാറിയാണ് മൃതദേഹം കിടന്നത്. അവിടെ വരെ ഇയാള്‍ക്ക് പോകേണ്ട ആവശ്യവും ഉണ്ടായിരുന്നില്ലെന്നാണ് പോലീസിന്‍റെ വിലയിരുത്തല്‍. അവിവാഹിതനായ മഹീന്ദ്രന്‍ ഡിഎച്ച് ആര്‍എം സജീവ പ്രവര്‍ത്തകനായിരുന്നുവെന്ന് പോലീസിന് വിവരം ലഭിച്ചിട്ടുണ്ട്.
മൃതദേഹം ഇന്നു പോസ്റ്റുമോര്‍ട്ടം നടത്തും.മരണത്തെ സംബന്ധിച്ച കാരണങ്ങള്‍ അതിനുശേഷമേ വ്യക്തമാകുകയുള്ളൂ. അന്വേഷണം ആവശ്യപ്പെട്ട് ബന്ധുക്കളും രംഗത്തെത്തിയിട്ടുണ്ട്.
