കാട്ടാക്കട: 50 പവൻ സ്വർണാഭരണങ്ങളും 50,000 രൂപയുമായി സ്വർണ്ണ പണയസ്ഥാപനത്തിലെ ജീവനക്കാരനെ കാണാതായ സംഭവത്തിലെ അന്വേഷണത്തിൽ പുരോഗതിയില്ല. കഴിഞ്ഞ വെള്ളിയാഴ്ച കാണാതായ സ്വർണപ്പണയ സ്ഥാപനത്തിലെ ജീവനക്കാരന്‍റെ സിസിടിവി. ദൃശ്യങ്ങൾ പോലീസിനു കിട്ടി.
പേരൂർക്കടയിൽനിന്ന് മരുന്നു വാങ്ങിയ ശേഷം നെടുമങ്ങാട് റോഡു വഴി അഴീക്കോടു വരെ ഇയാൾ സ്‌കൂട്ടറിൽ സഞ്ചരിക്കുന്ന ദൃശ്യങ്ങളാണ് കണ്ടെത്തിയത്.
തുടർന്നിങ്ങോട്ടുള്ള ക ാമറകൾ വിശദമായി പരിശോധിച്ചെങ്കിലും അതിലൊന്നുംതന്നെ ഇയാളുടെ ദൃശ്യങ്ങളില്ല. പറണ്ടോട്ടെ സ്വകാര്യ സ്വർണപ്പണയ സ്ഥാപനത്തിലെ ജീവനക്കാരൻ കുളപ്പട സുവർണനഗർ ഏദൻസിൽ മോഹനനെയാണ് വെള്ളിയാഴ്ച ഉച്ചയോടെ കാണാതായത്.
പേരൂർക്കട സർവീസ് സഹകരണ ബാങ്കിൽ പണയംവച്ചിരുന്ന 50 പവൻ സ്വർണാഭരണങ്ങളും 50,000 രൂപയുമായി വരുന്നതിനിടെയാണ് തിരോധാനം. ബാങ്കിൽ നിന്നിറങ്ങി പേരൂർക്കടയിലെ മെഡിക്കൽ സ്റ്റോറിൽ കയറിയ ശേഷമാണ് ഇയാൾ പണവും സ്വർണവുമായി മുങ്ങിയത്.
