തിരുവനന്തപുരം: കോവളം എംഎൽഎ എം. വിൻസെന്‍റിനെതിരായ പീഡനകേസ് അന്വേഷിക്കാൻ സർക്കാർ പ്രത്യേക സംഘത്തെ നിയോഗിച്ചു. കൊല്ലം സിറ്റി പോലീസ് കമ്മിഷണർ അജിതാ ബീഗത്തിന്‍റെ നേതൃത്വത്തിലാണ് സമിതിയെ നിയോഗിച്ചിരിക്കുന്നത്. എംഎൽഎ ആറു മാസമായി മാനസികമായി പീഡിപ്പിച്ചതിനെ തുടർന്ന് വീട്ടമ്മ ജീവനൊടുക്കാൻ ശ്രമിച്ചെന്ന പരാതിയിലാണ് അന്വേഷണം. സംഭവത്തിൽ തന്നെ കുറ്റക്കാരനാക്കാൻ ശ്രമം നടക്കുന്നതായി കാണിച്ച് എംഎൽഎ മുഖ്യമന്ത്രിക്ക് പരാതി നൽകിയിരുന്നു.
അമിതമായി ഗുളിക കഴിച്ചു ജീവനൊടുക്കാൻ ശ്രമിച്ച ബാലരാമപുരം സ്വദേശിനിയായ വീട്ടമ്മ നെയ്യാറ്റിൻകരയിലെ സ്വകാര്യ ആശുപത്രിയിൽ ചികിത്സയിലാണ്. എംഎൽഎ ആറു മാസമായി മാനസികമായി പീഡിപ്പിച്ചതിനെ തുടർന്നാണ് ആത്മഹത്യാ ശ്രമമെന്നു വീട്ടമ്മയുടെ ഭർത്താവ് പോലീസിൽ മൊഴി നൽകി. ഇതേ തുടർന്ന് എം. വിൻസെന്‍റിനെതിരേ പോലീസ് കേസ് എടുത്തു. വീട്ടമ്മയ്ക്കു ഓർമ തിരികെ ലഭിച്ചിട്ടില്ലാത്തതിനാൽ അവരുടെ മൊഴി രേഖപ്പെടുത്താനായിട്ടില്ല.
അതേസമയം, വീട്ടമ്മ ജീവനൊടുക്കാൻ ശ്രമിച്ച സംഭവത്തിൽ തനിക്കെതിരെ ഉയർന്ന ആരോപണം അടിസ്ഥാന രഹിതമാണെന്ന് എം. വിൻസെന്‍റ് എംഎൽഎ പത്രസമ്മേളനത്തിൽ പറഞ്ഞു.
