സ്വന്തം ലേഖകൻ
തൃശൂർ: പ്രധാനമന്ത്രി എന്താ പറയാൻ പോണത്..എന്തെങ്കിലും ന്യൂസുണ്ടോ….പ്രധാനമന്ത്രി നരേന്ദ്രമോദി ഉച്ചയ്ക്ക് രാജ്യത്തെ അഭിസംബോധന ചെയ്യുമെന്ന് ടിവി ചാനലുകളിൽ ബ്രെയ്ക്കിംഗ് ന്യൂസ് പോയ ഉടൻ പത്രമോഫീസിലേക്ക് വന്ന ഫോണ് കോളുകളിൽ പലതിനും അറിയേണ്ടത് മോദി എന്തു പറയാൻ പോകുന്നുവെന്നാണ്.
രാജ്യത്ത് എന്തോ സംഭവിക്കാൻ പോകുന്നുവെന്ന തോന്നലാണ് രാജ്യത്താകമാനമുണ്ടായത്. ബിജെപി ഓഫീസിലേക്കും മോദി പറയാൻ പോകുന്നത് എന്നു ചോദിച്ച് വിളികൾ പോയിരുന്നു.വീണ്ടും നോട്ട് നിരോധിക്കുമോ എന്ന് ചോദിച്ചവരേറെ. ഇലക്ഷൻ റദ്ദാക്കുകയോ വല്ലതും ഉണ്ടാകുമോ എന്ന് സംശയിച്ചവരുമുണ്ട്.
തട്ടുകടകളിലും ഹോട്ടലുകളിലും ഓഫീസുകളിലും എന്നു വേണ്ട വീടുകളിലടക്കം ഉച്ചയ്ക്ക് ചർച്ച ഇതു തന്നെയായിരുന്നു. ഓണ്‍ലൈൻ സൈറ്റുകൾക്ക് മുന്നിലും ചാനലുകൾക്ക് മുന്നിലും ആളുകൾ ആകാംക്ഷയോടെ കാത്തിരുന്ന നിമിഷങ്ങളായിരുന്നു ഇന്നുച്ചയ്ക്ക് കടന്നുപോയത്.
ഹിന്ദി മനസിലാകുന്നവരെ കൂട്ടുപിടിച്ച് ടിവി നോക്കിയിരുന്നവരുമുണ്ടായിരുന്നു.തെരഞ്ഞെടുപ്പ് പ്രചരണം നടത്തുകയായിരുന്ന സ്ഥാനാർത്ഥികളും സംഗതിയറിയാനുള്ള ആകാംക്ഷയിലായിരുന്നു. പലരും ഓണ്‍ലൈനിൽ സംഗതിയറിയാൻ നോക്കിയിരുന്നു.
ഉപഗ്രഹത്തെ ആക്രമിച്ചു വീഴ്ത്തുന്നതിൽ ഇന്ത്യ വിജയിച്ചെന്ന പ്രഖ്യാപനം പ്രധാനമന്ത്രി നടത്തിയപ്പോൾ ഇതു പറയാനാണോ എന്ന കമന്‍റാണ് ആളുകളിൽ നിന്നും ആദ്യമുണ്ടായത്.എങ്കിലും ആൾക്കൂട്ടം മോദി കൂടുതൽ വല്ലതും പറയുമോ എന്നറിയാൻ കാത്തിരുന്നു.മല പോലെ വന്നത് എലിപോലെ പോയെന്നും ആളുകൾ പറയുന്നുണ്ടായിരുന്നു.
