മുംബൈ: പ്രധാനമന്ത്രി നരേന്ദ്ര മോദിയെ കെട്ടിപ്പിടിക്കുന്ന കോണ്ഗ്രസ് അധ്യക്ഷൻ രാഹുൽ ഗാന്ധിയുടെ പടംവച്ച് പോസ്റ്ററടിച്ച് മഹാരാഷ്ട്ര കോണ്ഗ്രസ് നേതൃത്വം. മുംബൈ അന്ധേരിയിലാണ് പോസ്റ്ററുകൾ ഉയർന്നതെന്ന് എഎൻഐ വാർത്താ ഏജൻസി റിപ്പോർട്ട് ചെയ്തു.
മുംബൈ കോണ്ഗ്രസ് പ്രസിഡന്‍റ് സഞ്ജയ് നിരുപം ചിത്രങ്ങൾ ട്വിറ്ററിൽ പങ്കുവച്ചിട്ടുണ്ട്. ഞങ്ങൾ സ്നേഹത്തിലൂടെ ജയിക്കും, വെറുപ്പിലൂടെയല്ല എന്ന അടിക്കുറിപ്പോടെയാണ് പോസ്റ്റർ അച്ചടിച്ചിരിക്കുന്നത്. കഴിഞ്ഞ ദിവസം പാർലമെന്‍റിൽ അവിശ്വാസ പ്രമേയ ചർച്ചയ്ക്കിടെയാണ് രാഹുൽ മോദിയെ കെട്ടിപ്പിടിച്ചത്.
നിങ്ങൾക്കെന്നെ പപ്പു എന്നു വിളിക്കാം. എന്നാൽ എന്‍റെയുള്ളിൽ നിങ്ങളോട് വെറുപ്പ് ഒട്ടുമില്ല. കാരണം ഞാൻ കോണ്ഗ്രസുകാരനാണ് എന്ന് പാർലമെന്‍റിലെ പ്രസംഗത്തിനൊടുവിൽ രാഹുൽ പറഞ്ഞിരുന്നു. ഇതിനുശേഷമാണ് അദ്ദേഹം പ്രധാനമന്ത്രി നരേന്ദ്ര മോദിക്കു സമീപമെത്തി അദ്ദേഹത്തെ ആലിംഗനം ചെയ്തത്.
