കോൽക്കത്ത: ഡ്യൂറൻഡ് കപ്പിൽ മോഹമുത്തം. 2023 ഡ്യൂറൻഡ് കപ്പ് മോഹൻ ബഗാൻ സൂപ്പർ ജയ്ന്‍റ് സ്വന്തമാക്കി. ചിരവൈരികളായ ഈസ്റ്റ് ബംഗാളിനെ ഫൈനലിൽ 1-0നു കീഴടക്കിയാണ് മോഹൻ ബഗാന്‍റെ കിരീട ധാരണം. 71-ാം മിനിറ്റിൽ ദിമിത്രി പെട്രാറ്റോസിന്റെ ഗോളാണ് മോഹൻ ബഗാനു കിരീടം സമ്മാനിച്ചത്.
സഹലിന്‍റെ ആദ്യ ട്രോഫി
ക്ലബ് തലത്തിൽ മലയാളി താരം സഹൽ അബ്ദുൾ സമദിന്‍റെ ആദ്യ ട്രോഫിയാണ് 2023 ഡ്യൂറൻഡ് കപ്പ്. ജൂലൈയിലാണ് കേരള ബ്ലാസ്റ്റേഴ്സിൽനിന്ന് സഹൽ മോഹൻ ബഗാനിൽ എത്തിയത്. ഈസ്റ്റ് ബംഗാളിനെതിരായ ഫൈനലിൽ മോഹൻ ബഗാൻ സൂപ്പർ ജയ്ന്‍റ് ക്ലബ്ബിന്‍റെ സ്റ്റാർട്ടിംഗ് ഇലവനിൽ സഹൽ ഇറങ്ങി.
23 വർഷത്തിനുശേഷം
മോഹൻ ബഗാൻ ഡ്യൂറൻഡ് കപ്പ് സ്വന്തമാക്കുന്നത് നീണ്ട 23 വർഷത്തിനുശേഷമാണ്. 2000ലായിരുന്നു ഡ്യൂറൻഡ് കപ്പ് മോഹൻ ബഗാൻ അവസാനമായി സ്വന്തമാക്കിയത്. ചരിത്രത്തിൽ മോഹൻ ബഗാന്‍റെ 17-ാം ഡ്യൂറൻഡ് കപ്പ് ട്രോഫി നേട്ടമാണ് ഇത്തവണത്തേത്. ഡ്യൂറൻഡ് കപ്പ് ഏറ്റവും കൂടുതൽ നേടിയ ക്ലബ്ബും മോഹൻ ബഗാൻതന്നെ.
