സുരാജ് വെഞ്ഞാറമ്മൂട് എന്ന് പറയുമ്പോഴേ മലയാളികളുടെ മനസില്‍ ഓടിവരുന്ന ഒരു സീനുണ്ട്. എന്റെ ശിവനേ എന്ന ഡയലോഗ് പറയുന്ന ഒരു സീന്‍. ട്രോളന്മാര്‍ എപ്പോഴും എടുത്തുപയോഗിക്കുന്ന ഒരു സീന്‍. കോമഡിയും നായകവേഷവും അഭിനയിച്ച് തകര്‍ത്ത് ദേശീയ അവാര്‍ഡുവരെ സ്വന്തമാക്കിയ സുരാജ് ഇപ്പോഴിതാ ഒഒരു സിനിമയ്ക്കുവേണ്ടി പാടുകയും ചെയ്തിരിക്കുന്നു.
കുട്ടന്‍പിള്ളയുടെ ശിവരാത്രി എന്ന സിനിമയിലാണ് സുരാജ് പാടിയിരിക്കുന്നത്. ഗാനത്തിന്റെ സംവിധാനം നിര്‍വഹിച്ചിരിക്കുന്നതാവട്ടെ, ഗായിക സയനോരയും. ഗാനവുമായി ബന്ധപ്പെട്ട് സുരാജ് തന്റെ ഫേസ്ബുക്ക് പേജില്‍ പോസ്റ്റ് ചെയ്തിരിക്കുന്ന ഒരു വീഡിയോയാണ് ഇപ്പോള്‍ വാര്‍ത്തയായിരിക്കുന്നത്.
സുരാജിന്റെ ഈ പാട്ട് കേള്‍ക്കാനായി റിക്കോര്‍ഡിങ് സ്റ്റുഡിയോയില്‍ എത്തിയ മോഹന്‍ലാലിന്റെ വീഡിയോയാണത്. ചിത്രത്തിന്റെ ഓഡിയോ ലോഞ്ചിനെത്താന്‍ സാധിക്കാഞ്ഞതിനാല്‍ അണിയറ പ്രവര്‍ത്തകരുടെ അഭ്യര്‍ഥന മാനിച്ച് അദ്ദേഹം ഗാനം കേള്‍ക്കാന്‍ സ്റ്റുഡിയോയിലേക്കെത്തുകയായിരുന്നു.
പാട്ട് കേട്ട മോഹന്‍ലാല്‍ എല്ലാം ചെയ്യുന്നയാളായി സുരാജ് മാറിയെന്നും എന്തും ചെയ്യാനുള്ള ധൈര്യം സുരാജിന്റെ ഉള്ളിലുണ്ടെന്നും പറഞ്ഞു. ഗാനത്തിനു സംഗീതം നല്‍കിയ സയനോരയെയും അദ്ദേഹം അഭിനന്ദിച്ചു. ഇനിയും നല്ല പാട്ടുകള്‍ ചെയ്യാന്‍ സാധിക്കട്ടെ എന്ന് അദ്ദേഹം ആശംസിച്ചു. ചിത്രത്തിന്റെ സംവിധായകനായ ജീന്‍ മര്‍ക്കോസും മോഹന്‍ലാലിനൊപ്പമുണ്ടായിരുന്നു.
