മോഹൻലാലിന്‍റെ മകൻ പ്രണവ് നായകനായി അരങ്ങേറ്റം കുറിക്കുന്ന “ആദി’ ജനുവരി 26ന് തീയറ്ററുകളിൽ എത്തുകയാണ്. പ്രണവിനെ സംബന്ധിച്ചിടത്തോളം വെറുമൊരു തീയതിയല്ല ജനുവരി 26. ആദിയുടെ റിലീസ് തീയതിയും മോഹൻലാലും തമ്മിൽ അഭേദ്യമായ ബന്ധമുണ്ടെന്നാണ് സോഷ്യൽ മീഡിയായിൽ പരക്കെയുള്ള സംസാരം. കാരണം പതിനേഴ് വർഷങ്ങൾക്കു മുന്പ് ഇത് ദിവസത്തിലാണ് മോഹൻലാൽ നായകനായി എത്തിയ സൂപ്പർഹിറ്റ് ചിത്രം “നരസിംഹം’ തിയറ്ററുകളിലെത്തിയത്. ഈ ചിത്രത്തിലൂടെ അച്ഛൻ നേടിയ വിജയം നായകനായുള്ള കന്നി ചിത്രത്തിലൂടെ മകനും ആവർത്തിക്കുമെന്ന വിശ്വാസത്തിലാണ് ആരാധകരെല്ലാം.
ഉൗഴത്തിനു ശേഷം ജീത്തു ജോസഫ് തിരക്കഥ രചിച്ച് സംവിധാനം ചെയ്യുന്ന ആദി ആക്ഷൻ ത്രില്ലർ ശ്രേണിയിലാണ് ഒരുക്കിയിരിക്കുന്നത്. മാത്രമല്ല ചിത്രത്തിനായി ആയോധനകലയായ പാർക്കൗറും പ്രണവ് പരിശീലിച്ചിരുന്നു. “സം ലൈസ് കാൻ ബി ഡെഡ്‌ലി’ എന്നാണ് ചിത്രത്തിന്‍റെ പേരിന്‍റെ ടാഗ്‌ലൈൻ. ചിത്രത്തിന്‍റെ ടീസർ ഉടൻ പുറത്തിറക്കുമെന്നാണ് സംവിധായകൻ അറിയിച്ചത്.
