ഒടുവിൽ ട്രെൻഡിനൊപ്പം ലാലേട്ടനും എത്തി. അതേ പറഞ്ഞുവരുന്നത് ഇൻസ്റ്റഗ്രാമിൽ അടുത്തിടെ വൈറലായ ട്രെൻഡിനെ കുറിച്ചാണ്. ലാലേട്ടൻ കമന്‍റ് ചെയ്താലേ ഞങ്ങൾ ഈ ബിസ്ക്കറ്റ് കഴിക്കൂ എന്ന ഇൻസ്റ്റഗ്രാം റീലിനാണ് കമന്‍റുമായി സാക്ഷാൽ മോഹൻലാൽ എത്തിയത്.
എന്നാൽ ഈ റീലിൽ മോഹൻലാൽ കമന്‍റിട്ടതിന്‍റെ ഞെട്ടലിലാണ് ആരാധകർ. ഇങ്ങനത്തെ കേസ് ഒന്നും എടുക്കാത്തതാണല്ലോ പിന്നെ എന്തുപറ്റി? എന്നാണ് ആരാധകർ ഒന്നടങ്കം ചോദിക്കുന്നത്.
‘കഴിക്ക് മോനേ… ഫ്രണ്ട്സിനും കൊടുക്കൂ’ എന്നാണ് ലാലേട്ടൻ റീലിന് കമന്‍റ് ചെയ്തിരിക്കുന്നത്. എന്നാൽ ഇത് ലാലേട്ടൻ തന്നെയാണോ എന്ന് ഉറപ്പിക്കാനുള്ള തിടുക്കത്തിലായിരുന്നു ആരാധകർ.
ഇഷ്ടതാരങ്ങളുടെ കമന്‍റ് ചോദിച്ചുള്ള റീലുകൾ അടുത്തിടെയായി ഇൻസ്റ്റഗ്രാമിൽ ട്രെൻഡിംഗിലാണ്. ടൊവിനോ, ജോജു ജോർജ്, ബേസിൽ ജോസഫ്, ജയസൂര്യ, നസ്‌ലിൻ തുടങ്ങി നിരവധി താരങ്ങളാണ് ആരാധകരുടെ വീഡിയോകളിൽ കമന്‍റിട്ട് ട്രെൻഡിനൊപ്പം എത്തിയത്.
‘ ഈ വീഡിയോയ്ക്ക് ടൊവിനോ തോമസ് കമന്‍റ് ചെയ്താലേ ഞാൻ പഠിക്കൂ’ എന്ന അടിക്കുറിപ്പോടെ താഹ എന്ന യുവാവ് കുറച്ച് ദിവസം മുൻപാണ് വീഡിയോ പോസ്റ്റ് ചെയ്തത്. തുടർന്ന് ‘പോയിരുന്ന് പഠിക്ക് മോനേ’ എന്നായിരുന്നു വീഡിയോയ്ക്ക് ടൊവിനോ തോമസ് മറുപടി നൽകി കമന്‍റിട്ടത്.
കാനഡയിൽ നിന്ന് മടങ്ങി വരണമെങ്കിൽ ബേസിൽ ജോസഫ് കമന്‍റ് ചെയ്യണം എന്ന് പറഞ്ഞ ആളോട് ‘മകനെ മടങ്ങി വരൂ’ എന്നാണ് ബേസിൽ ജോസഫ് പറഞ്ഞത്.
വിജയ് ദേവരക്കൊണ്ടയുടെ കമന്‍റ് അഭ്യർഥിച്ച് വീഡിയോ പങ്കുവച്ച വിദ്യാർഥിനികൾക്കും സമാനമായ അനുഭവം തന്നെയാണ് ഉണ്ടായത്. ഹർഷിത റെഡ്ഡി എന്ന ഇൻസ്റ്റഗ്രാം അക്കൗണ്ടിലാണ് ‘വിജയ് ദേവരക്കൊണ്ട ഈ വീഡിയോയ്ക്ക് കമന്‍റ് ചെയ്താൽ ഞങ്ങൾ പരീക്ഷയ്ക്കുള്ള തയാറെടുപ്പ് ആരംഭിക്കും’ എന്ന് എഴുതിയ വീഡിയോ പോസ്റ്റ് ചെയ്തത്.
വീഡിയോ ഇൻസ്റ്റഗ്രാമിൽ വൈറലായതോടെ ‘പരീക്ഷയിൽ 90 ശതമാനം മാർക്ക് നേടിയാൽ ഞാൻ നിങ്ങളെ നേരിട്ട് വന്ന് കാണാം’ എന്ന കമന്‍റുമായി വിജയ്‌യുടെ കമന്‍റുമെത്തി. തുടർന്ന് സമാനരീതിയിൽ ഇഷ്ടതാരങ്ങളുടെ കമന്‍റ് ചോദിച്ചുള്ള വീഡിയോകൾ സോഷ്യൽ മീഡിയയിൽ വൈറലാവാൻ തുടങ്ങി.
