കൊച്ചി: പീഡനക്കേസിലെ പരാതിക്കാരിയായ യുവതി മോന്‍സന്‍ മാവുങ്കലിനെതിരേ മുഖ്യമന്ത്രിക്ക് പരാതി നൽകി.
ചേര്‍ത്തല സ്വദേശിക്കെതിരായ ലൈംഗിക പീഡനപരാതിയില്‍നിന്നു പിന്‍മാറാന്‍ മോന്‍സന്‍ ഇടപെട്ട സാഹചര്യത്തില്‍ തന്‍റെ ജീവനുപോലും ഭീഷണിയുണ്ടെന്നും പീഡനക്കേസില്‍ കൃത്യമായ അന്വേഷണം വേണമെന്നും ചൂണ്ടിക്കാട്ടി എറണാകുളം സ്വദേശിനിയാണ് പരാതി നല്‍കിയത്.
മോന്‍സന്‍റെ പക്കലുളള മൊബൈല്‍ ഫോണ്‍ അടക്കം പിടിച്ചെടുക്കണമെന്നും പരാതിയില്‍ ആവശ്യപ്പെട്ടിട്ടുണ്ട്.
ഇന്നലെ ഓണ്‍ലൈന്‍ ആയാണ് യുവതി പരാതി നൽകിയത്. വിവാഹവാഗ്ദാനം നല്‍കി പീഡിപ്പിച്ചെന്നു കാണിച്ച് ചേര്‍ത്തല നോര്‍ത്ത് സ്വദേശിയായ എസ്. ശരത്തിനെതിരേ യുവതി 2021 ഫെബ്രുവരിയില്‍ കളമശേരി പോലീസില്‍ പരാതി നല്‍കിയിരുന്നു.
മോന്‍സന്‍റെ ബിസിനസ് പങ്കാളിയാണ് ശരത്തിന്‍റെ കുടുംബം. പരാതി പിന്‍വലിക്കാൻ മോന്‍സന്‍ ഗുണ്ടകളെയും രാഷ്ട്രീയക്കാരെയും ബിസിനസുകാരെയും അയച്ചു.
കേസില്‍നിന്നു പിന്മാറിയാൽ പത്തു ലക്ഷം രൂപ തരാമെന്നും കേസ് പിന്‍വലിച്ചില്ലെങ്കില്‍ നഗ്‌നവീഡിയോയും ഫോട്ടോകളും സമൂഹമാധ്യമങ്ങളില്‍ പ്രചരിപ്പിക്കുമെന്നും മോന്‍സന്‍ ഭീഷണിപ്പെടുത്തിയെന്നും പരാതിയിൽ പറയുന്നു.
