മൂവാറ്റുപുഴ: മൂവാറ്റുപുഴയിൽ യുവാവിനെ വനിതാസുഹൃത്തിന്‍റെ സഹോദരൻ വെട്ടിപ്പരിക്കേൽപ്പിച്ചു. കൊച്ചിയില്‍ സ്വകാര്യ ഇന്‍സ്റ്റിറ്റ്യൂട്ടില്‍ ഓട്ടോമൊബൈല്‍ എൻജിനിയറിംഗ് വിദ്യാർഥിയായ പണ്ടിരിമല തടിലക്കുടിപ്പാറയിൽ അഖിലിനാണ് വെട്ടേറ്റത്.
കഴുത്തിന് വെട്ടേറ്റ അഖിലിനെ ഗുരുതരമായ പരിക്കുകളോടെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ഞായറാഴ്ച വൈകിട്ട് നൂറ്റിമുപ്പത് കവലയ്ക്ക് സമീപമാണ് സംഭവം. അഖിലുമായി പ്രണയത്തിലായിരുന്ന യുവതിയുടെ സഹോദരന്‍ കറുകടം സ്വദേശി ബേസില്‍ എല്‍ദോസാണ് വടിവാളുമായി ആക്രമിച്ചത്.
മാസ്ക് വാങ്ങാന്‍ മെഡിക്കല്‍ ഷോപ്പിലെത്തിയ അഖിലിനെ ബേസില്‍ വടിവാളുകൊണ്ട് കഴുത്തിലും കൈയിലും വെട്ടുകയായിരുന്നു.നാട്ടുകാർ ഓടിക്കൂടിയപ്പോൾ ബേസിൽ രക്ഷപ്പെട്ടു. പ്രതിക്കായി തെരച്ചിൽ ഊർജിതമെന്ന് പോലീസ് അറിയിച്ചു.
