തിരുവല്ല: ഓണ്‍ലൈനിലൂടെ 10000 രൂപ വായ്പയെടുത്തു തിരിച്ചടച്ച യുവതിയുടെ മോര്‍ഫ് ചെയ്ത ദൃശ്യങ്ങള്‍ പ്രചരിപ്പിച്ച് ഭീഷണിപ്പെടുത്തി വീണ്ടും പണം തട്ടാന്‍ നീക്കം.
പരാതിയില്‍ യുപി സ്വദേശികള്‍ക്കെതിരെ തിരുവല്ല പോലീസ് കേസെടുത്തു. പെരിങ്ങര സ്വദേശിനിയുടെ പരാതിയിലാണ് കേസ്.
ഓണ്‍ലൈനില്‍ നിന്നു ലഭിച്ച ലിങ്ക് ഉപയോഗിച്ച് യുവതി ഒരുവര്‍ഷം മുമ്പ് യുവതി യുപി സ്വദേശികളില്‍ നിന്നു 10000 രൂപ വായ്പയെടുത്തിരുന്നു.
കാലാവധിക്കുള്ളില്‍ പണം തിരികെ അടയ്ക്കുകയും ചെയ്തു. കഴിഞ്ഞ 25നു യുവതിക്ക് യുപിയില്‍ നിന്നും ഒരു ഫോണ്‍ കോള്‍ എത്തി. ഓണ്‍ലൈന്‍ വഴി വീണ്ടും 10000 രൂപ കൂടി ആവശ്യപ്പെട്ടു.
യുവതി ഇതു നിരസിച്ചതോടെ ഫോണിലെ ഫോട്ടോകള്‍ ഉള്‍പ്പെടെ മുഴുവന്‍ വിവരങ്ങളും തങ്ങളുടെ പക്കലുണ്ടെന്നു ഭീഷണി മുഴക്കി.
പണം നല്‍കാതെ വന്നതോടെ യുവതിയുടേതെന്ന തരത്തില്‍ മോര്‍ഫ് ചെയ്ത അശ്ലീല ചിത്രങ്ങള്‍ ബന്ധുക്കള്‍ അടക്കമുള്ളവരുടെ ഫോണുകളിലെത്തി.
ഇതേത്തുടര്‍ന്നാണ് യുവതി പോലീസില്‍ പരാതി നല്‍കിയത്. പരാതിയില്‍ ഐടി ആക്്ട് പ്രകാരം കേസെടുത്തതായും സൈബര്‍ സെല്ലിന്‍റെ സഹായത്തോടെ അന്വേഷണം നടത്തുമെന്നും പോലീസ് അറിയിച്ചു.
